Алматыда Сайран көліне құятын Үлкен Алматы өзенінің арнасына интерактивті арт-нысан орнатылды. Жобаға DASM Group құрамындағы «Progression CA» ЖШС жарнама агенттігі бастамашы болды, деп хабарлайды QazMonitor Алматы қаласы әкімдігінің баспасөз қызметіне сілтеме жасап.
Арт-нысанды орнатуға бюджет қаражаты жұмсалмаған. Жобаны толықтай бастамашы агенттік қаржыландырған. Нысан Қоғамдық кеңістіктерді дамыту басқармасымен келісілген және наурыз айының соңында ресми түрде ашылады.
Мүсіннің идеясы Алматыдағы Сайран көлі маңында болған итті құтқару оқиғасына негізделген. Бұл жағдай қоғамда кең талқыланып, адамгершілік пен жанашырлық құндылықтарын тағы бір мәрте алға шығарған еді.
Арт-нысанның тұжырымдамасы өзара көмек, ынтымақ пен бірлік идеясын бейнелейді. Композицияда бір-бірімен байланысқан адамдар арқылы қиын сәтте қолдау көрсету мен бірлескен әрекеттің маңызы көрсетілген.
Заманауи интерактивті форматта жасалған нысан қала тұрғындары мен қонақтары үшін жаңа тартымды орынға айналмақ. Жоба қоғамдық кеңістіктерді дамытуға және бірлік пен ынтымақтастық құндылықтарын насихаттауға бағытталған.