Жаңа жыл мерекесі қарсаңында «Астана Балет» театры көрермен назарына қысқы маусымға арналған репертуарын ұсынды. Бағдарламада сиқыр мен ертегі атмосферасына толы балет қойылымдары қамтылған.
Қысқы маусымның басты қойылымдарының бірі – «Щелкунчик» балеті. Жаңа жылдық мерекенің символына айналған бұл туынды сегіз жылдан бері театр сахнасында аншлагпен өтіп келеді. Жыл сайын көрерменге 10-15 спектакль ұсынылады. Қойылымға «Астана Балет» театрының әртістерімен қатар Қазақ ұлттық хореография академиясының студенттері де қатысады. Жас көрермендер үшін 19, 20, 21 және 23 желтоқсан күндері балеттің балаларға арналған ықшамдалған нұсқасы сахналанады.
Репертуар аясында 7, 9 және 10 қаңтарда «Қар ханшайымы» балеті көрсетіледі. Ханс Кристиан Андерсеннің әйгілі ертегісінің желісімен қойылған спектакльде достық, мейірім мен махаббат тақырыптары би тілімен өрнектеледі.
Қысқы қойылымдар легін 23 және 24 қаңтарда сахналанатын «Күлше қыз» балеті түйіндейді. Бұл қойылым кейіпкердің табандылығы мен өзіне деген сенімін бейнелейді.
Барлық спектакльдер «Астана Балет» театрының симфониялық оркестрінің сүйемелдеуімен өтеді. Оркестрді бас дирижер Арман Оразғалиев пен дирижер Элмар Бөрібаев басқарады.
Дереккөз: ҚР Мәдениет және ақпарат министрлігі