Астананың орталық саябағында салынған екі қабатты ғимараттың жалпы аумағы шамамен 2 мың шаршы метрді құрайды, бір ауысымда 300 адамға дейін қабылдай алады, деп хабарлайды QazMonitor. Нысан құрылысы 2025 жылдың сәуірінде басталып, 2026 жылдың қаңтарында аяқталған. Бүгінгі таңда 30 жаңа жұмыс орны ашылды. Жаңадан ашылған шаңғы базасын Үкімет басшысы Олжас Бектенов аралап көрді.
База заманауи жаттығу құрылғыларымен жабдықталған. Атап айтқанда, спортшылардың төзімділігін арттырып, конькимен сырғанау техникасын жетілдіруге мүмкіндік беретін «Skate Treadmill RL3500E» кәсіби тренажері орнатылған. Сонымен қатар шаңғы мен спорттық жабдықтарды дайындау, сақтау және кептіруге арналған арнайы бөлмелер қарастырылған.
Премьер-министр заманауи инфрақұрылым елдің олимпиадалық әлеуетін күшейту үшін маңызды екенін атап өтті. Оның айтуынша, бұқаралық спортты дамыту мен жоғары жетістіктер спортына жағдай жасау – ұлт денсаулығы мен халықаралық беделге салынған инвестиция.
Жаңа база балалар мен жасөспірімдер спорт мектебі, олимпиадалық резервті даярлау орталығы және жоғары спорт шеберлігі мектебі тәрбиеленушілерінің негізгі жаттығу алаңына айналады. Мұнда шаңғы жарысымен қатар биатлон және спорттық бағдарлау бағыттары да дамиды. Алғашқы кезеңде 15 жаттықтырушының жетекшілігімен 180 спортшы жаттығады, болашақта олардың санын 360-қа дейін арттыру жоспарланған.
Республика бойынша спорт инфрақұрылымы кеңейіп келеді: 2023 жылы халықтың спорт нысандарымен қамтылуы 52,2% болса, 2025 жылы 59,6%-ға жеткен. Ал спортпен тұрақты айналысатындардың үлесі 44,5%-ға дейін артқан.
Жұмыс сапары қорытындысында Үкімет басшысы салалық министрліктер мен қала әкімдігіне олимпиадалық резервті даярлау және жастарды бұқаралық спортқа тарту бағытындағы жұмысты күшейтуді тапсырды.