Республикада сыртқы миграцияның оң сальдосы байқалады. Бұл Қазақстаннан тұрақты тұруға кететіндердің азайғанын және керісінше, болашақта азаматтық алу үшін елге көшіп келушілердің көбейгенін білдіреді, деп хабарлайды QazMonitor Energyprom.kz сайтына сілтеме жасап.
2025 жылғы мәліметтер бойынша, Қазақстан Республикасының сыртқы миграциясы плюс 16,2 мың адам деңгейінде оң сальдоны сақтап қалды. Өткен жылы елге 23,8 мың адам келіп, 7,6 мың адам кеткен. Бұл жердегі негізгі фактор – келушілер ағынының артуы ғана емес, эмиграцияның күрт қысқаруы, яғни Қазақстаннан кететін адамдар санының азаюы.
Қай елдерден көшіп келеді?
Елдер бөлінісінде негізгі өсім көзі ТМД мемлекеттері болып қала береді. Былтыр бұл елдерден 19,4 мың адам келіп, небәрі 5,5 мың адам кеткен. Негізінен, Қазақстанға Өзбекстаннан 11,7 мың адам қоныс аударған. Сондай-ақ Тәжікстан, Түркіменстан, Қырғызстан және Әзербайжан елдері де айтарлықтай үлес қосты. Ресеймен теңгерім нөлге тең болды: 4,7 мың адам келіп, дәл сондай 4,7 мың адам елден кеткен.
Қытайдан былтыр 2,6 мың адам келіп, небәрі 7 адам кеткен. Бұдан бөлек, Моңғолия, Түркия, Грузия және Оңтүстік Кореядан көшіп келушілер бар. Келгендердің жартысы – ер адамдар.
Мамандықтар тұрғысынан алғанда, Қазақстанға негізінен техникалық мамандық иелері, сонымен қатар педагогтар, медиктер, экономика және заң саласының мамандары келді.
Сонымен қатар, Қазақстаннан Германияға кетушілер бар: ол жаққа 1,2 мың адам кетсе, Қазақстанға 298 адам келген. Халықтың кетуі АҚШ (150 адам), Польша (230 адам) және Канада (73 адам) бағыттарында да байқалды.