Түркістан әуежайында монополияға қарсы заңнаманы бұзу фактілері анықталып, 14,3 миллион теңге мөлшерінде әкімшілік айыппұл салынды, деп хабарлайды QazMonitor.
Бәсекелестікті қорғау және дамыту агенттігінің Түркістан облысы бойынша департаменті авиаотынды бөлшек саудада өткізу нарығына талдау жүргізу барысында бәсекелестік заңнамасын бұзу белгілерін анықтады.
Талдау нәтижесіне сәйкес, әуежайдың Кәсіпкерлік кодекстің талаптарын бұзғаны анықталған. Атап айтқанда, әуежай тиісті нарықта үстем жағдайға ие бола отырып, авиаотынды бөлшек саудада өткізетін кәсіпкерлік субъектісіне келісім мәніне қатысы жоқ қосымша міндеттемелер жүктеген.
Тергеп-тексеру барысында әуежай аумағында авиаотынды өткізу құқығы үшін кәсіпкерден алым өндірілгені белгілі болды. Департамент бұл әрекеттерді үстем жағдайды теріс пайдалану ретінде бағалады.
Нәтижесінде сот шешімімен әуежай әкімшілік жауапкершілікке тартылып, 14,3 млн теңге көлемінде айыппұл салынды.