2026 жылғы 18 ақпандағы жағдай бойынша, еліміздің оңтүстік өңірлеріндегі су қоймаларында жиналған су көлемі өткен жылмен салыстырғанда 759 млн текше метрге аз. Осы көрсеткіш вегетациялық кезеңдегі су тапшылығы қаупін арттырып отыр. Бұл туралы Үкімет отырысында Су ресурстары және ирригация министрі Нұржан Нұржігітов мәлімдеді, деп хабарлайды QazMonitor.
Министрдің айтуынша, 2025 жылғы 1 желтоқсанда аталған су қоймаларындағы су көлемі 17,7 млрд текше метрді құраған, бұл 2024 жылдың сәйкес кезеңінен 2,3 млрд текше метрге төмен болған. Қабылданған жедел шаралардың нәтижесінде соңғы екі айда су жинау қарқыны артып, қосымша 1,5 млрд текше метр су жиналды.
«Ерекше алаңдаушылық туғызатыны – негізінен ішкі су көздері есебінен толатын су қоймаларының толу деңгейі», деді министр.
Атап айтқанда, Бөген су қоймасы көлемі 278 млн текше метрді құрайды (жобалық сыйымдылығы – 370 млн текше метр). Бұл өткен жылмен салыстырғанда 46 млн текше метрге аз. Бадам су қоймасы 32 млн текше метрге толған, бұл өткен жылдың сәйкес кезеңінен 18 млн текше метрге кем.
Ұқсас жағдай Жамбыл облысындағы Теріс-Ащыбұлақ су қоймасы, Қарақоңыз су қоймасы, Қақпатас су қоймасы, Жартас су қоймасы және Бүркітті су қоймасы нысандарында қалыптасқан.
Осыған байланысты, сондай-ақ өткен жылы аталған өңірлерде вегетациялық кезең күрделі өткенін ескере отырып, Түркістан және Жамбыл облыстары әкімдіктеріне ылғалды көп қажет ететін ауыл шаруашылығы дақылдарының егіс алқаптарын шектеу жөнінде шара қабылдау ұсынылды.