Әлеуметтік кодекске сәйкес жұмыс берушілер белгіленген квота аясында азаматтардың осы санатын жұмысқа орналастыруды қамтамасыз етеді, деп хабарлайды QazMonitor.
2026 жылы квота 2,6 мың жұмыс берушіге белгіленіп, 16,7 мың жұмыс орнын қамтып отыр. Бұл мүгедектігі бар азаматтар үшін тұрақты табыс тауып, кәсіби әлеуетін жүзеге асыруға қосымша мүмкіндік береді.
Квоталауға қатысатын жұмыс берушілердің тізбесі аудандар мен қалалар бөлінісінде электрондық еңбек биржасында жарияланған. Бұл жұмыс іздеушілерге өз өңіріндегі қолайлы бос жұмыс орындарын жедел табуға мүмкіндік береді.
Мамандардың айтуынша, жұмыс орындарын квоталау тек жаңа жұмыс орындарын құруға емес, сонымен қатар инклюзивті еңбек ортасын қалыптастыруға ықпал етеді. Бұл әр азаматтың еңбек етуіне және қоғамда өз орнын табуына жағдай жасайды.
ҚР Еңбек және халықты әлеуметтік қорғау министрлігі бұл бағыттағы жұмысты жалғастырып, ақпарат қолжетімділігін арттыруға, квотаның орындалуын мониторингілеу мен бағалау тетіктерін жетілдіруге басымдық бермек. Сонымен қатар 50-ден астам қызметкері бар жұмыс берушілер үшін квоталардың автоматтандырылған есебін енгізу жоспарланып отыр.
Сондай-ақ мансап орталықтары тарапынан жұмыс берушілерге квоталанатын жұмыс орындарына кандидаттарды іріктеуде практикалық қолдау көрсетіледі.