Алматының Түрксіб ауданында әлеуметтік инфрақұрылымды дамыту жұмыстары қарқынды жүргізіліп жатыр. Бұл туралы Өңірлік коммуникациялар қызметінде өткен баспасөз конференциясында аудан әкімі Дамир Әкежанов мәлімдеді, деп хабарлайды QazMonitor.
Оның айтуынша, оқушы орындарының тапшылығын азайту мақсатында биыл қыркүйек айында «Келешек мектептері» ұлттық жобасы аясында жалпы сыйымдылығы 6100 орындық төрт жаңа мектеп ашу жоспарланған. Олар Time City, Парасат, Altyn City және Jeti Qazyna тұрғын үй кешендері аумағында салынады. Бұл қолданыстағы білім беру ұйымдарына түсетін жүктемені едәуір төмендетпек.
Сонымен қатар, биыл тағы үш білім беру нысанының құрылысы басталған. Атап айтқанда, №170 мектепке 125 орындық қосымша ғимарат 2026 жылдың тамызында пайдалануға беріледі. Ал №78 мектеп-гимназиясын 450 орынға кеңейту және №198 мектеп-гимназиясына 600 орындық қосымша құрылыс салу жобалары 2027 жылдың тамызына жоспарланған. Бұдан бөлек, №142, №89, №74, №84 және №20 мектептерді жаңғырту мен салу бойынша тағы бес жоба әзірленуде. Бұл шаралар қазіргі 1770 орындық тапшылықты жоюға мүмкіндік береді.
Ауданда мектептермен қатар мектепке дейінгі білім беру нысандарының да саны артады. Қазіргі таңда 2543 орын жетіспейтінін ескере отырып, маусым айында «Қайрат» шағын ауданында 260 орындық №192 балабақша ашылады. Сондай-ақ «Алтай», «Әлмерек» және «Жас Қанат» шағын аудандарында тағы төрт балабақша салу жоспарланып отыр.