Алматыда атмосфералық ауаның ластануына әсер ететін негізгі факторлардың бірі саналатын автокөлік шығарындыларын бақылау жұмыстары жалғасып жатыр, деп хабарлайды QazMonitor.
Eco Almaty өкілдерінің мәліметінше, 2026 жылдың басынан бері жүргізілген мониторинг барысында 5 496 автокөлік тексерілген. Оның ішінде 1 301 көліктен пайдаланылған газдар құрамындағы зиянды заттардың белгіленген нормативтерден асып кеткені анықталды. Бұл тексерілген көліктердің шамамен әр төртіншісіне тиесілі.
Анықталған заң бұзушылықтар бойынша көлік иелеріне қатысты әкімшілік хаттамалар толтырылды.
Алматыда автокөлік шығарындыларын бақылау қала ауасын қорғау қағидалары аясында тұрақты түрде жүргізіледі. Мониторингтің негізгі мақсаты – белгіленген экологиялық талаптарға сәйкес келмейтін көліктерді анықтап, олардың қоршаған ортаға кері әсерін азайту.