Ауыл шаруашылығы министрі Айдарбек Сапаров Түркияның Cengiz Holding компаниясы директорлар кеңесінің мүшесі Дженгиз Шабанмен қант саласындағы бірлескен жобаларды талқылап, оны іске асыру жөніндегі өзара түсіністік туралы меморандумға қол қойылды.
Министрдің айтуынша, Қазақстан импортқа тәуелділікті азайтып, ішкі нарықты отандық өніммен қамтамасыз ету үшін қант саласын жүйелі түрде жаңғыртуға басымдық беріп отыр. Қазіргі уақытта елде төрт қант зауыты жұмыс істейді, оның үшеуі жылына 870 мың тонна қант қызылшасын өңдей алады. Алайда ішкі тұтыну көлемі 500 мың тонна болғанымен, отандық шикізат есебінен қамту үлесі небәрі 14%-ды құрайды.
Cengiz Holding Қазақстанда жылына 300 мың тонна қант өндіретін екі зауыт салу мүмкіндігін қарастырып отыр. Компания жобаны жүзеге асыру үшін 10 жылға 500 млн доллар инвестиция салуға дайын екенін хабарлады. Жаңа өндіріс орындары үшін Солтүстік Қазақстан және Павлодар облыстарының климаттық жағдайлары, инфрақұрылымы мен жер ресурстары зерттеліп жатыр.
Құрылыс жұмыстарын келесі жылы бастап, екі зауытты екі жыл ішінде іске қосу жоспарланып отыр. Жоба іске асқанда ішкі нарықты қантпен қамтамасыз ету деңгейі артып қана қоймай, мал азығы, техникалық спирт және тамақ өнеркәсібіне арналған қосалқы өнімдер шығаратын өндірістер де дамиды.
Тараптар алдағы уақытта жобаны жүзеге асыру қадамдарын егжей-тегжейлі пысықтауға уағдаласты.
Дереккөз: Ауыл шаруашылығы министрлігі