Алматы облысында «Батыс Еуропа – Батыс Қытай» халықаралық дәлізі бойында жаңа Еуразиялық индустриалды-логистикалық парк ашылды. Нысан өңірдің «Шығыс қақпасы» инфрақұрылымдық аймағына кіріп, Алматы мен облыстың кеңістіктік дамуындағы маңызды логистикалық хабқа айналмақ.
Логистикалық парк құрылысына 22 млрд теңге инвестиция салынды. Бірінші кезеңде 50,3 мың шаршы метр болатын «А» санатындағы заманауи екі қойма корпусы іске қосылды.
Әкімдік мәліметінше, парк толық қуатына 2026 жылы шықпақ. Сол кезде 250 адам тұрақты жұмыспен қамтылады.
«Бүгін ашылып отырған логистикалық парк – елдің транзиттік мүмкіндігін арттыруға, халықаралық сауда ағымдарын тиімді басқаруға және өңірлік ықпалдастықты тереңдетуге бағытталған маңызды жоба. «А» санатындағы жаңа нысандардың іске қосылуы – облыс экономикасының тұрақты дамуы мен инвесторлардың сенімінің нақты көрінісі, сондай-ақ мемлекет пен бизнестің тиімді серіктестігінің нәтижесі», деді Алматы облысының әкімі Марат Сұлтанғазиев.
Қойманың Алматы қаласына, үлкен Алматы айналма жолына, халықаралық әуежайға және ірі автожолдарға жақын орналасуы оны Орталық Азиядағы ірі дистрибуция орталығы ретінде дамытуға мүмкіндік береді.
«14 гектар аумақта 50 мың шаршы метрлік «А» санатындағы қойма салынды. Төбе биіктігі – 12 метр, еденнің жүк көтерімділігі – шаршы метріне 8 тонна. Бұл кез келген стеллажды немесе көпдеңгейлі сақтау жүйесін орнатуға мүмкіндік береді», Еуразиялық логистикалық парктің атқарушы директоры Роман Жужлев.
Бүгінде электрондық сауда қарқыны қойма инфрақұрылымына деген сұранысты еселеп арттырып отыр. 2024 жылы e-commerce үлесі бөлшек сауданың 14,5% жеткен, бұл 2021 жылмен салыстырғанда алты есе көп.
Ozon Қазақстан компаниясының басшысы Алексей Сапон онлайн-сауда тиімділігінің заманауи қоймаларға тікелей байланысты екенін айтса, DNS компаниясының логистика жөніндегі федералдық басшысы Владимир Любимов жергілікті хабтар желісі тапсырыстарды жеткізу уақытын айтарлықтай қысқартатынын атап өтті.
Инвесторлар парк аумағын Құлжа бағыты арқылы кеңейтуді көздеп отыр. Жоспарда 300 мың шаршы метрге дейін қосымша қоймалық алаң салу және көрші елдердің нарығына шығу қарастырылған. Sudakov Group бас директоры Алексей Судаков айтуынша, функционалды қойма нысандарына сұраныс тұрақты түрде артуда.
Сонымен қатар ашылу салтанатында NOYTECH және «Еуразиялық логистикалық парк» арасында стратегиялық әріптестік туралы келісімге қол қойылды. NOYTECH-тің Қазақстандағы директоры Валерия Кошелева жаңа нысан жоғары технологиялық сервистерді дамыту мен қызмет түрлерін кеңейтуге мүмкіндік ашатынын жеткізді.
Дереккөз: Алматы облысы әкімдігі