«Әлеуметтік әмиян» цифрлық сервисі енгізілген сәттен бастап азаматтарға ыңғайлы цифрлық форматта дәрі-дәрмек беру бойынша 13 миллионнан астам қызмет көрсетілді. Бұл амбулаториялық дәрілік қамтамасыз ету (АДҚ) шеңберінде жазылған барлық тағайындаулардың 81,2%-ын құрайды.
Жобаға еліміздің барлық өңірінен 708 медициналық ұйым қосылған. Дәрі-дәрмекпен қамтамасыз ету деңгейі e-Densaulyq, Halyk, ВЦК, Face ID және SMS-код цифрлық тетіктері арқылы берілген рецепттерді қосқанда 85,1%-ға жеткен.
Рецепттердің 14,9%-ы әлі де қағаз форматында орындалады. Бұл смартфон мен интернеті жоқ азаматтар, сондай-ақ мобильділігі төмен қарттар мен балалар үшін маңызды.
Дәрі-дәрмек алу процесі толық автоматтандырылған: дәрігер eGov mobile мобильдік қосымшасындағы «Әлеуметтік әмиян» арқылы электрондық ваучер түрінде рецепт жасайды.
Пациент дәріханада ваучерді QR-код ретінде көрсетеді, провизор оны сканерлеп, тағайындалған препараттарды береді.
Бұл жүйе деректерді қолмен енгізуді жойып, қызмет көрсету уақытын қысқартады. Сонымен қатар дәрі-дәрмектерді беру процесінің ашықтығы мен дәл бақылауын қамтамасыз етеді.
Дереккөз: ҚР Денсаулық сақтау министрлігі