Қазақстанда зейнетақы жинағына көз ауруларын емдеуге шектеу қойылғаннан кейін пластикалық оталар деген сұраныс артқан. Бүгіннен бастап зейнетақы қаржысына реконструктивті және қалпына келтіру (пластикалық) операцияларды төлеуге тыйым салынады. Бұл туралы Отбасы банктің баспасөз қызметі хабарлады.
enpf-otbasy.kz платформасында стоматология мен офтальмологияға БЗҚ қаражатын пайдалану үшін өтінім қабылдау тоқтатылғаннан кейін, қазақстандықтар жаппай жаңа мақсатты таңдай бастаған. Банк мәліметінше, әсіресе операциядан кейінгі тыртықтарды түзету және туа біткен ақауларды коррекциялау үшін сұраныс артқан.
«Бұрын банкке пластикалық оталарға БЗҚ қаражатын пайдалану туралы азаматтардан орта есеппен 16 өтініш түсетін. Алайда қыркүйекте стоматология бойынша өтінім қабылдау тоқтаған кезде олардың саны 123-ке дейін өсті, қазанда – 1 844-ке, ал қарашада – 3 878 өтінішке жетті. Желтоқсанның алғашқы 8 күнінде, офтальмологияға өтінім қабылдау тоқтағаннан кейін, пластикалық оталарға БЗҚ пайдалану бойынша 2 093 өтініш түсті. Бұл – бұрынғы айлық орташа көрсеткіштен 130 есе көп», делінген ақпаратта.
Желтоқсан айындағы өтінімдердің жалпы сомасы 1,8 млрд теңгеге жетті. Отбасы банк пластикалық оталарға деген қызығушылықтың күрт артқанын байқаған кезде, бұл жағдайдан БЗҚ қаражатын мақсатсыз пайдалану қаупін көргенін айтады.
«Сондықтан осы бағыт бойынша өтінім қабылдауды тоқтатуға мәжбүр болдық. ... БЖЗҚ-дағы қаражат – азаматтардың болашақ зейнетақысы. Иә, қазақстандықтар зейнетақы артылған қаражатын белгілі бір мақсаттарға пайдалана алады. Қазір осы мүмкіндікті желеу етіп, кейбіреулер БЗҚ қаражатын делдалдар арқылы заңсыз жолмен шешіп алып жатыр. Ал шын мәнінде, пайда тауып отырған – сол делдалдар. Отбасы банкі үшін ең маңыздысы – зейнетақы қаражатының нақты мақсатына жұмсалуын қамтамасыз ету және оны заңсыз баю құралына айналдырмау, – деді Отбасы банк басқарма төрайымы Ләззат Ибрагимова.
Осылайша enpf-otbasy.kz порталында 2025 жылдың 12 желтоқсанынан бастап БЖЗҚ қаражатын «Операциядан кейінгі тыртықтарды және туа біткен ақауларды түзетуге арналған реконструктивті және қалпына келтіру (пластикалық) операциялары» мақсаты бойынша пайдалану үшін өтінім қабылдау тоқтатылады.
Қазіргі уақытта пластикалық операцияларға БЗҚ қаражатын пайдалану бойынша 6 294 өтінім қаралып жатыр. Бұл өтінімдердің барлығы қолданыстағы тәртіпке сәйкес өңделеді.
Сонымен қатар банк азаматтарда өздерінің зейнетақы жинақтарының бір бөлігін өмірлік маңызды, құны жоғары және әрдайым қолжетімді бола бермейтін ем түрлеріне бағыттай алатынын айтты. Атап айтқанда мұндай медициналық қызметтерге сирек (орфандық) ауруларды емдеу, радионуклидтік және радиойод терапиясы, радиохирургиялық емдеу; протондық терапия жатады.
Бұдан бөлек, азаматтар зейнетақы артылған қаражатты тұрғын үй жағдайын жақсартуға пайдалана алады: тұрғын үй сатып алу, ипотеканы толық немесе жартылай өтеу, сондай-ақ Отбасы банктегі депозитті толықтырып, кейін баспана алу мүмкіндігі барын еске салды.