Алматының мектепке дейінгі білім беру мекемелерінде 2 мыңнан астам маман жетіспейді. Тапшылықтың 90%-ы жекеменшік секторда байқалады. Бұл туралы ҚР Премьер-министрінің орынбасары – мәдениет және ақпарат министрі Аида Балаеваның төрағалығымен Алматыда өткен әлеуметтік саланы дамыту мәселелеріне арналған кеңесте айтылды.
Оқу-ағарту министрі Жұлдыз Сүлейменованың мәліметінше, Алматыда 1 065 мектепке дейінгі ұйым жұмыс істейді, оның 866-сы жекеменшік. Қамтылған балалар саны – 86 мың. Қалада 2 мыңнан астам педагог жетіспейді, тапшылықтың 90%-ы жекеменшік секторда байқалады.
Сонымен қатар мектептердегі оқушылар саны жыл сайын 10-13 мыңға өсіп отыр, ал қолданыстағы инфрақұрылымда 27 мыңға жуық орын тапшылығы сақталып отыр.
Цифрлық жүйелерді енгізу барысында жекеменшік балабақшалар мен мектептерде бірқатар заңбұзушылықтар тіркелген. Атап айтқанда, жалған есеп жүргізу және іс жүзінде жұмыс істемейтін қызметкерлерді тіркеу фактілері анықталды. Нәтижесінде жеті жекеменшік мектеп мемлекеттік білім беру тапсырысына қатысу құқығынан айырылды.
Осыған байланысты Аида Балаева цифрландырудың басты мақсаты – бақылауды күшейту емес, басқару сапасын арттыру және ресурстарды тиімді пайдалану екенін атап өтті.
«Цифрландыру мен жасанды интеллектінің белгілі бір қиындықтарымен қатар, артықшылықтары да бар. Біз осы артықшылықтарды, ең алдымен, жұмыс үдерістерін оңтайландыру үшін пайдалануымыз керек. Тіпті кей цифрлық жүйелер мектепке дейінгі және орта білім беру саласындағы жалған тіркелген азаматтар мәселесінің ауқымын көрсетті. Біз барлығын бірдей айыптағымыз келмейді, бірақ жүйеге және жалпы мұғалімдер қауымына кедергі келтіріп отырған басқарушылар бар», деді Аида Балаева.
Ғылым және жоғары білім вице-министрі Гүлзат Көбенованың дерегінше, Алматыда 236 мың студент білім алып жатыр, бұл елдегі барлық студенттердің шамамен үштен біріне тең. 2032 жылға дейін талапкерлер саны жыл сайын 23–24 мың адамға артуы мүмкін. Бұл жоғары білім инфрақұрылымын алдын ала кеңейтуді талап етеді.
Сонымен қатар жиында техникалық және кәсіптік білім беру жүйесіндегі мәселелер туралы айтылды. Бірқатар колледждерде материалдық база ескірген, ал кей мамандықтар еңбек нарығының нақты сұранысына сай келмейді. Сонымен қатар жасанды интеллектінің дамуына байланысты кей мамандықтардың ескіріп бара жатқаны айтылды.
Дереккөз: Оқу-ағарту министрлігі