Шетелдік AllChinaReview сараптамалық платформасы Қазақстанның Еуразия кеңістігіндегі жетекші көлік-логистикалық орталыққа айналу әлеуетін жоғары бағалады. Сарапшылардың пікірінше, теңізге тікелей шығатын жолы болмаса да, Қазақстан Еуропа мен Азияны байланыстыратын негізгі транзиттік буын ретіндегі рөлін нығайтып келеді.
Соңғы жылдары елде көлік инфрақұрылымына ауқымды инвестициялар тартылып, транзиттік саясат жүйелі түрде іске асырылуда. Қазіргі таңда Қазақстан аумағы арқылы Қытайды, Орталық Азияны, Кавказды, Ресейді, Еуропа мен Таяу Шығысты байланыстыратын 5 халықаралық теміржол және 8 автокөлік дәлізі өтеді. 2024 жылы транзиттік жүк көлемі 34,6 млн тоннаға жетіп, бір жылда 7,1 пайызға өскен. Алдағы жылдары бұл көрсеткішті 2029 жылға қарай 67 млн тоннаға, 2035 жылға дейін 100 млн тоннаға жеткізу көзделген.
Орта дәліздің стратегиялық маңызын ерекше ден қойылып отыр. Қытай – Қазақстан – Каспий теңізі – Кавказ – Еуропа бағытын қамтитын Транскаспий бағыты балама маршрут ретінде сұранысқа ие. 2024 жылы бұл бағытпен 4,5 млн тонна жүк тасымалданған.
Көлік пен логистика Қазақстан экономикасындағы ең қарқынды дамып келе жатқан салалардың біріне айналды. Соңғы айларда көлік қызметтерінің көлемі 20 пайыздан астам өсіп, салаға құйылған инвестициялар да айтарлықтай артқан. Теміржол жүк тасымалы мен әуе қатынасы тұрақты өсім көрсетіп отыр.
Материалда трансшекаралық логистикалық хабтарды дамытуға да назар аударылған. «Қорғас – Шығыс қақпасы», Ақтау теңіз порты, «TURAN» арнайы экономикалық аймақтары мен бірқатар индустриялық аймақтар көлік, қойма және өндірісті бір экожүйеге біріктіріп отыр. Сонымен қатар теміржол, автожол және порт инфрақұрылымын жаңғырту жобалары жүзеге асырылуда.
Сарапшылардың пікірінше, Мемлекет басшысы Қасым-Жомарт Тоқаев айқындаған Қазақстанды Орталық Азиядағы басты көлік хабына айналдыру стратегиясы нақты нәтижелер беріп келеді. Еліміз өзінің географиялық орналасуын тиімді пайдаланып, Еуропа мен Азия арасындағы сенімді және болжамды көлік көпірі ретіндегі орнын күшейтіп отыр.