Қазақстан үкіметі отандық фармацевтика өндірісінің үлесін 50%-ға жеткізу стратегиясы аясында ірі инвестициялық жобаны мақұлдады. Премьер-министр Олжас Бектенов қол қойған қаулыға сәйкес, Алматы маңындағы «Алатау» арнайы экономикалық аймағында толық циклді биофармацевтикалық кешен бой көтереді.
Жобаның инвесторы - «Khan Tengri Biopharma» ЖШС. Құжатқа сәйкес, нысанды салуға және жабдықтауға бағытталған инвестицияның жалпы көлемі 103 млрд теңгеден асады.
Кешен іске қосылғанда 58 препарат түрі шығарылады деп күтілуде, 180-нен астам жаңа тұрақты жұмыс орны ашылады.
Жаңа зауыт тек ішкі нарықты қамтып қана қоймай, Қазақстанның экспорттық позициясын нығайтуды көздейді. Өндірістік портфельге 27 халықаралық патенттелмеген атау (ХПА) кіреді. Олардың ішінде ең күрделі және әлеуметтік маңызы бар онкологиялық аурулар, аутоиммундық дерттер, сирек (орфандық) аурулар мен қабынуға қарсы препараттар болады.
Бұл кешенді салу - импортқа тәуелділіктен арылудың маңызды қадамы. Үкімет жоспары бойынша, шығарылатын өнімнің бір бөлігі ЕАЭО, ТМД және Таяу Шығыс елдерінің нарықтарына экспортталады.