Астана қаласындағы №45 мектепте еліміздегі алғашқы мамандандырылған мектеп дзюдо залы ашылды. Жоба Туризм және спорт министрлігі, Оқу-ағарту министрлігі және спорт ұйымдарының бірлескен жұмысы аясында жүзеге асырылды.
Жаңа зал Judo in Schools бағдарламасы аясында ашылды. Бағдарлама мектептерде заманауи жабдықтармен қамтылған дзюдо залдарын кезең-кезеңімен құруды көздейді. №45 мектепке арнайы спорттық инвентарь мен дзюдо кимонолары тегін табысталды.
Сондай-ақ министрліктер мен федерациялар арасында мектеп спортын дамыту бойынша ынтымақтастық туралы меморандумға қол қойылды. Құжат тараптардың тұрақты өзара іс-қимылын қамтамасыз етеді.
Туризм және спорт министрі Ербол Мырзабосынов бұл ашылу балаларды спортқа баулуға, салауатты өмір салтын насихаттауға және болашақ ұлттық құрама спортшыларын анықтауға көмектесетінін атап өтті.
Оқу-ағарту министрі Жұлдыз Сүлейменова дзюдо арқылы балалардың төзімділікке, қарсыласты сыйлауға және үйлесімді өмір сүруге үйренетінін айтты.
Қазақстанда дзюдо спорты тұрақты дамып келеді. Елдос Сметовтің Париж Олимпиадасындағы алтын жүлдесінен кейін спортқа қызығушылық артты. Қазіргі таңда елде шамамен 90 мың адам дзюдомен айналысып, 1300-ге жуық жаттықтырушы спортшыларды даярлап отыр.
Дереккөз: ҚР Туризм және спорт министрлігі