Қарағанды зообағының коллекциясы Қызыл кітапқа енген жолақты гиеналар мен гиенатектес иттермен толықты, деп хабарлайды QazMonitor.
Жолақты гиена 2008 жылдан бері IUCN Red List тізіміне енгізілген. Бұл - Африкадан тыс аймақтарда кездесетін гиенаның жалғыз түрі. Қарағанды зообағы тарихында жолақты гиеналар алғаш рет пайда болып отыр.
Қазір зообақта екі ұрғашы және бір аталық жолақты гиена, сондай-ақ бір аталық және бір ұрғашы гиенатектес ит бар. Жануарлар Ереваннан алмасу бағдарламасы аясында жеткізілген. Бұған дейін қарағандылық зообақ Ереванға жыртқыштарды жіберген.
Зообақ директоры Гүлнар Адамбекова келіссөздер шамамен бір жылға созылғанын айтты. Осы уақыт ішінде жаңа тұрғындарға арналған кең вольер дайындалып, күтім ерекшеліктері зерделенген.
«Оларды күту қиын емес, азық рационы да экзотикалық емес. Олар ет, тауық еті, тірі жем жейді. Біз өз жыртқыштарымызды да осындай азықпен қоректендіреміз», деді Адамбекова.
Олар Қарағандыға ұшақпен жеткізілген. Ауа райының суытуына байланысты жерүсті тасымалынан бас тартылған. Қазіргі уақытта олар карантинде, тәулік бойы бақылауда. Соған қарамастан, келушілер жыртқыштарды көре алады. Олар табиғатынан түнгі уақытта белсенді болғандықтан, күндіз көбіне ұйықтайды.
Көктемге дейін жыртқыштар жылытылатын ғимаратта болады. Жылы мезгіл басталған соң оларды ашық вольерге көшіру жоспарланып отыр. Зообақ әкімшілігі жануарлар жаңа ортаға толық бейімделіп, болашақта ұрпақ береді деп үміттенеді.