Алматылық Jolda Dance Theatre заманауи би театры Еуропадағы беделді фестивальдердің бірі – schrit_tmacher Festival халықаралық заманауи би фестивалінің 31-ші маусымына қатысады, деп хабарлайды QazMonitor.
Алматы Туризм басқармасының мәліметінше, ұжымның TAMYR спектаклі 13–14 наурыз күндері Ахен қаласында сахналанады.
Фестиваль бағдарламасында әлемнің жетекші шығармашылық ұжымдары өнер көрсетеді. Олардың қатарында NDT 1, TAO Dance Theater және Akram Khan Company бар.
Бұған дейін алматылық ұжым Avignon Off Festival алаңында өнер көрсеткен болатын. Енді қазақстандық театр Еуропадағы заманауи би өнерінің маңызды сахналарының бірінде ел мәдениетін таныстырмақ.
Айта кетейік, schrit_tmacher Festival шекарааралық мәдени ынтымақтастық пен мәдени диалогты насихаттайтын алаң ретінде танымал. Фестиваль философиясында би халықтарды жақындастыратын әмбебап тіл ретінде қарастырылады.