Астанада 1-7 қазан аралығында өткен Қазақстанның халық әртісі Меруерт Өтекешеваның 75 жылдығына арналған «ТЕАТР АLL» IV халықаралық театр фестивалі аяқталды, деп хабарлайды QazMonitor елорда әкімдігіне сілтеме жасап.
Фестивальге Өзбекстан, Қырғызстан және Әзербайжанның театр ұжымдары, сондай-ақ Астана мен Қазақстанның бірқатар өңірлерінен келген театрлар қатысты. Қазылар алқасы бірнеше номинация бойынша үздіктерді анықтады.
«Үздік қойылым» жүлдесі Ғ.Мүсірепов атындағы Қазақ мемлекеттік академиялық балалар мен жасөспірімдер театрының «Ұлпан» спектакліне берілді. «Үздік актерлік ансамбль» аталымында Б.Кыдыкеева атындағы Қырғыз мемлекеттік жас көрермен театрының «Жәмилә» қойылымы жеңімпаз атанды.
«Үздік режиссура» жүлдесін Н.Жантурин атындағы Маңғыстау облыстық сазды драма театрының «Той» спектаклін қойған Дина Жұмабаева иеленді.
Жеке актерлік номинацияларда «Шәкәрім» спектакліндегі рөлі үшін Аян Өтепберген «Үздік ер адам бейнесі» аталымын жеңіп алды. «Үздік әйел адам бейнесі» жүлдесі Полина Харламоваға, ал «Үздік актерлік дуэт» жүлдесі Өзбекстан мемлекеттік драма театрының әртістері Нодир Мухаммаджонов пен Хусния Турамуротоваға табысталды.
«Үздік сценография» аталымында Қанат Мақсұтов, «Спектакльдің үздік музыкасы» номинациясында Батырхан Сабыр үздік деп танылды. Екінші пландағы үздік ер адам бейнесі үшін Мұхтар Қосыбай, әйел адам бейнесі үшін Гюль Зиятова марапатталды.
Фестивальдің арнайы жүлделері де табысталды. «Асанәлі Әшімов атындағы жүлде» Нұржан Бейсбековке, «Хадиша Бөкеева атындағы жүлде» Гүлдана Көшербаеваға, «Құман Тастанбеков атындағы жүлде» әзербайжандық актер Зия Агаға берілді. Ал «Меруерт Өтекешева атындағы жүлдеге» Анна Каренина рөлін сомдаған Ақмарал Танабаева ие болды.
Кәсіби бағыттағы арнайы аталымдарда «Үздік балетмейстер» жүлдесін Карина Жиренбаева, «Режиссурадағы жаңа есім» аталымын Нұржан Ізтаев иеленді. Үздік эпизодтық ер адам рөлі үшін Ислам Мағытанов, әйел адам рөлі үшін Бибігүл Исалиева марапатталды.
Фестиваль халықаралық театр ұжымдарының шығармашылық тәжірибе алмасуына және театр өнеріндегі жаңа ізденістерді көрсетуге мүмкіндік берді.