2025 жыл қазақстандық киноиндустрия үшін экономикалық тұрғыдан нәтижелі кезеңге айналды. Мемлекеттік қолдаумен түсірілген «Qaitadan» көркем фильмі прокатта 1 млрд теңгеден астам табыс жинап, елдегі ең табысты отандық жобалардың қатарына кірді. Жобаға салынған бюджет қаражаты толық қайтарылып қана қоймай, бес есе өсіммен өтелді.
Бұл көрсеткіш мемлекеттік қолдау тетіктерінің тиімділігін көрсетіп, отандық киноны коммерциялық тұрғыдан өміршең сала ретінде қайта бағалауға мүмкіндік берді. Нарықтағы оң динамика аясында ҚР Мәдениет және ақпарат министрлігі Мемлекет басшысының тапсырмасына сәйкес «Кинематография туралы» заңға түзетулер енгізу жұмыстарын бастап кетті. Өзгерістер фильмдерді прокатқа шығаруға дейінгі сараптау жүйесін күшейтіп, ұлттық контент сапасын арттыруды көздейді.
Саланың тағы бір маңызды жаңалығы – «Қазақфильм» киностудиясын жаңғырту үдерісінің жандануы. Студияда қазақ киносының Алтын қорын қалпына келтіру жалғасып жатыр. Сонымен қатар соңғы 15 жылда алғаш рет ғимараттарды жөндеу жұмыстары жүргізілуде. Айта кетерлігі, жоба жекеменшік инвесторлар қаражаты есебінен, бюджеттен тыс қаржыландырылған.
Сонымен қатар Ұлттық киноны қолдау мемлекеттік орталығының 2025 жылғы конкурсы нәтижесінде 16 жаңа жоба іріктелді. Олардың басым бөлігі тарихи және патриоттық бағытқа арналған, бұл мемлекет қолдап отырған идеологиялық және мәдени басымдықтарды көрсетеді.
Айта кетейік, биыл қазақстандық прокатқа 10 фильм шықты, олардың қатарында «90+1», «Тарлан», «Игроманка», «Капитан Байтасов», «Qaitadan» және «Алтын адам» анимациялық жобасы бар. Бұл ішкі нарықтағы ұсыныстың біртіндеп кеңейіп келе жатқанын аңғартады.
Бұған қоса, Қазақстан киносы халықаралық деңгейде де белсенді болды. Отандық фильмдер АҚШ, Франция, Италия, Қытай және Ресейде өткен фестивальдерде көрсетіліп, 30-дан астам халықаралық марапатқа ие болды. Актер Бақыт Қажыбаев Қытайдың Чунцин қаласында өткен ШЫҰ кинофестивалінде «Үздік актер» атанып, кәсіби қауымдастықтың назарын аударды.