Әл-Фараби атындағы ҚазҰУ жанындағы «ZooStan» қазақ-француз халықаралық ғылыми орталығының директоры Уильям Рендю Орталық Азия халықаралық зерттеулер институтының жариялаған гранттық конкурсында жеңімпаз атанды, деп хабарлайды ҚазҰУ баспасөз қызметі.
Грантқа ие болған жоба – «Орталық Азиядағы неолиттің пайда болуы: Сазаған мәдениеті және оның археологиялық контексі». Жобаның басты мақсаты – Зеравшан өңіріндегі ерте неолит мәдениеттерін кешенді және пәнаралық тұрғыда зерттеу.
Сазаған мәдениетінің археологиялық ескерткіштері бірнеше ондаған жыл бойы Ш.Рашидов атындағы Самарқанд мемлекеттік университетінің профессоры Нурмахаммад Холматовтың жетекшілігімен зерттеліп келеді. Жаңа жоба осы ғылыми дәстүрді жалғастыра отырып, Холматовтың ғылыми тобымен тығыз әріптестік негізінде жүзеге асады.
Зерттеу барысында ежелгі халықтың өмір сүру стратегиялары, керамика мен тас құралдарын өндіру технологиялары қалпына келтіріледі. Сонымен қатар, биоархеология, археоботаника және абсолютті мерзімдеу әдістері сияқты заманауи аналитикалық тәсілдер қолданылады.
Жоба Қазақстан, Өзбекстан, Франция және Польша ғалымдарының бірлескен еңбегімен іске асады. Бұл ынтымақтастық ғылыми тәжірибе алмасуға, академиялық ұтқырлыққа және қазақстандық ғылымның жаһандық зерттеу кеңістігіне интеграциясына мүмкіндік береді.
Ғалымдардың айтуынша, жоба Орталық Азияның ежелгі тарихын зерттеуге елеулі үлес қосып, өңірдегі алғашқы егіншілік қоғамдардың қалыптасуын жаңаша пайымдауға жол ашады.