2025 жылы мемлекеттік тапсырыс аясында 240 мыңнан астам кітап басылып, өңірлік кітапханаларға таратылды. Бұл көрсеткіш ішкі нарықтың мазмұнын байытып қана қоймай, ұлттық әдеби брендтерді халықаралық деңгейге шығару стратегиясының бір бөлігі болып табылады, деп хабарлайды QazMonitor.
ҚР Мәдениет және ақпарат министрлігінің деректеріне сүйенсек, былтыр 119-дан астам аталымдағы әдебиет жарық көрген. Жалпы таралым саны 240 500 дананы құрады. Бұл ретте басымдық классикалық шығармалар мен мерейтойлық басылымдарға берілді. Олардың қатарында Абай Құнанбайұлының 180 жылдығына арналған еңбектер мен «Шоқан. Ерек туған феномен» фотоальбомі бар. Сонымен қатар, Ілияс Есенберлин, Жұмекен Нәжімеденов және Қадыр Мырза Әлі сияқты қазақ әдебиеті классиктерінің жинақтары қайта басылды.
Қазақстандық әдебиетті халықаралық деңгейде ілгерілету жұмысы жаңа кезеңге өтті. Министрлік отандық авторларды әлемдік нарыққа шығару үшін бірнеше маңызды қадамдар жасады. Атап айтқанда Римде Шоқан Уәлиханов туралы еңбектің итальян және ағылшын тілдеріндегі нұсқасы таныстырылды. Бұл жоба халықаралық ынтымақтастық аясында жүзеге асырылды. Қазақстан екінші жыл қатарынан әлемдегі ең ірі кітап жәрмеңкесінде ұлттық павильонын ұйымдастырды. Ең басты жетістік - жеті тілге аударылған «Абайдың қара сөздері. Ұрпаққа ұлағат» еңбегі мен халықаралық сарапшылардың жоғары бағасына ие болған «Бақытсыз Жамал» романының таныстырылымы өтті. Сонымен қатар Бейжің мен Гуанчжоудағы көрмелер қазақ әдебиетінің Азия нарығындағы сұранысын бағамдауға мүмкіндік берді.
Бұған қоса, былтыр Мәдениет министрлігі мен Қазақстан Жазушылар одағы арасындағы стратегиялық әріптестік аясында жас авторларды қолдауға бағытталған инвестициялар көлемі артты. Жүргізілген үш ауқымды жобаның нәтижесінде жас авторлардың 35 жаңа көркем және ғылыми-танымдық жинағы жарық көрді.
Бұл туындылар еліміздің барлық өңірлік кітапханаларына жеткізіліп, кітап қорын сапалық деңгейде жаңартты.
Еске салсақ, 2025 жылы Қазақстан кітапханаларына оқырмандар 37 миллион рет келген. Оқуға деген құлшыныстың ең белсенді бөлігі 17 мен 25 жас аралығындағы жастар екені анықталды. Мәселен, соңғы бір айдың өзінде Алматыдағы Қазақстан Республикасының Ұлттық кітапханасына шамамен 13 мың адам жүгінген. Салыстырмалы түрде, 45 жастан асқан келушілердің саны екі мыңға жуық.
Сонымен қатар былтыр шамамен 3 мың адам кітапханаға алғаш рет тіркелген. Жалпы Қазақстанда 3 883 қоғамдық кітапхана жұмыс істейді.