Қазақстанның Ғылым және жоғары білім министрлігінің тапсырысы бойынша қазақ тілін үйренуге арналған бірегей Steppe Rider жобасы іске қосылды, деп хабарлайды QazMonitor.
Ведомство мәліметінше, бұл – динамикалық раннер мен танымдық викторина элементтерін ұштастырған инновациялық білім беру өнімі.
Steppe Rider ойыншылары Барсик есімді қар барысымен бірге виртуалды әлемге саяхат жасап, түрлі тапсырмаларды орындайды. Ойын барысында әріптер мен сөздерді жинап, жаңа деңгейлерді ашу арқылы тілдік дағдыларын жетілдіреді.
Жобаның негізгі бірқатар функционалдық артықшылықтары бар. Атап айтқанда онда сөз құрастыруға арналған динамикалық раннер мен тыңдалым дағдыларын дамытатын викториналар бар. Оқыту деңгейлері пайдаланушының біліміне қарай үш сатыға (жеңіл, орташа, күрделі) бөлінген. Ойын ішіндегі арнайы валюта – «асықтар», жетістіктер рейтингі және интерактивті көмекші болса, отбасы, табиғат, тағам секілді маңызды тақырыптық модульдер қамтылған.
Әзірлеушілердің айтуынша, Steppe Rider жарқын визуалды стилі мен ұлттық нақыштағы дизайны арқылы балаларға да, ересектерге де тіл үйрену процесін қызықты әрі жеңіл етуді көздейді. Бұл жоба дәстүрлі оқу әдістемелерін заманауи технологиялық шешімдермен алмастырудың жарқын үлгісі болып табылады.
Ойын қазіргі таңда App Store және Google Play платформаларда қолжетімді.