Цифрлық мемлекетке көшу аясында Қазақстанда жасанды интеллект саласы үшін білікті кадрлар даярлау үшін еліміздегі білім беру жүйесіне әлемнің жетекші 12 шетелдік жоғары оқу орны тартылып отыр, деп хабарлайды QazMonitor.
ҚР ғылым және жоғары білім вице-министрі Гүлзат Көбенованың айтуынша, Сеул техникалық университетімен бірлесіп Қорқыт ата атындағы Қызылорда университеті базасында жасанды интеллект және информатика жоғары мектебі ашылған. Сонымен қатар Қ.Сәтбаев атындағы Қазақ ұлттық техникалық зерттеу университетінде City University of Hong Kong филиалы жұмысын бастап, жасанды интеллект бағытында қос дипломды білім беру бағдарламалары іске асырылуда.
Бұдан бөлек, Қазақстанда үш «Лу Бань шеберханасын» құру көзделген. Оның бірі Д.Серікбаев атындағы Шығыс Қазақстан техникалық университетінде ашылса, екіншісі Л.Н.Гумилев атындағы Еуразия ұлттық университеті базасында, ал үшіншісі М.Тынышпаев атындағы Логистика және көлік академиясында құрылып жатыр.
Қазіргі таңда еліміздің 30 жоғары оқу орнында жасанды интеллектке арналған 42 білім беру бағдарламасы енгізілген. «Қолданбалы ЖИ», «ЖИ және блокчейн инженериясы», «Медицинадағы ЖИ» сияқты бағыттар бойынша бакалавриат, магистратура және докторантура деңгейлерінде шамамен 3 мың студент білім алуда.