eGov Mobile мобильді қосымшасында мүлікті және азаматтық-құқықтық жауапкершілікті ерікті сақтандыруға арналған жаңа цифрлық сервис іске қосылды. Жобаны «Ұлттық ақпараттық технологиялар» АҚ мен «Tumar» сақтандыру брокері бірлесіп жүзеге асырды, деп хабарлайды QazMonitor.
Жаңа сервис арқылы пайдаланушылар тұрғын үй жылжымайтын мүлкін, сондай-ақ көршілер алдындағы азаматтық-құқықтық жауапкершілігін толықтай онлайн форматта сақтандыра алады. Сақтандыру тұрмыста жиі кездесетін негізгі тәуекелдерді, оның ішінде өрт, жарылыс және су басу салдарынан келтірілген залалды қамтиды. Полис ай сайынғы жазылу форматы бойынша рәсімделеді, бұл қызметті икемді әрі қолжетімді етеді.
«Tumar Home» сервисі енді eGov Mobile қосымшасында қолжетімді, осылайша азаматтар өз мүлкінің қорғалуын өздері қамтамасыз ете алады. Сақтандыруды рәсімдеу туралы шешім пайдаланушының өз еркінде, ал «ҰАТ» АҚ командасы серіктестермен бірлесіп сервистің мобильді қосымша экожүйесіне ыңғайлы әрі қауіпсіз интеграциялануын қамтамасыз етті», деді «ҰАТ» АҚ басқарма төрағасы Даулет Бекманов.
Сақтандыру полисін рәсімдеу үшін пайдаланушы eGov Mobile қосымшасында авторизациядан өтіп, «Хабарламалар» – «Хабарландырулар» бөліміндегі «Tumar Home» сервисін таңдайды. Бұдан кейін дербес деректерді өңдеуге келісім беріп, қажетті мәліметтерді толтырып, сақтандыру жарнасын төлейді.
Жазылу құны айына 1 500 теңгені құрайды. Жалпы төлем сомасы 500 мың теңгеге дейін жетуі мүмкін. Оның 250 мың теңгесіне дейінгі бөлігі мүлікке келтірілген залалды өтеуге, ал тағы 250 мың теңгеге дейінгі сома үшінші тұлғаларға келтірілген зиянды өтеуге бағытталады.
Сақтандыру өнімін іске асыруға Freedom Insurance, Basel және Alatau City Garant компаниялары қатысады. Компанияға қарамастан, пайдаланушылар үшін сақтандыру шарттары мен полис құны бірдей.
Қазіргі таңда сервис жылжымайтын мүлікке меншік құқығын енді тіркеген азаматтарға қолжетімді. Меншік құқығы тіркелгеннен кейін пайдаланушылар eGov Mobile қосымшасында сақтандыруды рәсімдеу жөнінде хабарландыру алады.