2025 жылы ақпараттық технологиялар саласы еңбек нарығындағы ең белсенді бағыттардың бірі болды. Мұны жұмыс берушілер жариялаған бос орындар мен үміткерлердің түйіндемелері негізінде hh.kz платформасы дайындаған зерттеу деректеріне сүйене отырып QazMonitor хабарлайды.
Бағдарламашылар көш бастап тұр, data-бағыт өсуде
2025 жылы IT саласындағы бос орындардың ең үлкен үлесі «Бағдарламашы, әзірлеуші» мамандығына тиесілі (20,1%). Алайда бұл бағытта сұраныс 10,7%-ға төмендеген. Сонымен қатар дизайнерлер мен техникалық қолдау мамандарына сұраныс артқан.
Ең жоғары өсім data-бағыттарда байқалды: BI-аналитиктерге сұраныс 100%-ға, ал дата-сайентистерге 110,6%-ға артқан. Сондай-ақ өнім менеджерлері мен бизнес-аналитиктер позициялары да күшейіп келеді.
Ал жүйелік әкімшілер, желілік инженерлер және классикалық аналитиктер сегментінде төмендеу тіркелген.
IT нарығы Алматы мен Астанада шоғырланған
Жұмыс берушілердің негізгі белсенділігі Алматыда (59,7%) және Астанада (28,1%) сақталып отыр. Астана 2025 жылы ең жоғары өсім көрсеткен ірі нарыққа айналды (+13%).
Өңірлерде де біртіндеп өсім бар: Шымкент, Ақтөбе және Қарағандыда IT-бос орындар саны артқан. Алайда Өскемен, Ақтау және Павлодарда төмендеу байқалады.
Аналитика мен басқарушылық позицияларға қызығушылық жоғары
IT саласында түйіндемелер саны да өскен. Ең көп үміткер «Бағдарламашы, әзірлеуші» (18,7%), «Дизайнер» және «Жоба жетекшісі» бағыттарында тіркелген.
Data және аналитикалық мамандықтарға қызығушылық айтарлықтай артқан: BI-аналитиктер (+43,9%), дата-сайентистер (+28,3%), жүйелік және бизнес-аналитиктер (+20%-дан жоғары өсім).
Ең жоғары жалақы күтімі басқарушылық лауазымдарда тіркелген. Атап айтқанда, техникалық директор (көлік жөндеу саласы) мен IT директоры (CIO) позицияларында күтілетін айлық 700 мың теңгеден жоғары.
Бәсеке деңгейі
2025 жылдың қорытындысы бойынша IT саласындағы бәсеке индексі 12,9-ды құрады. Яғни, бір бос орынға орта есеппен 13 түйіндеме келеді. Бір жыл ішінде көрсеткіш 7,3%-ға өсіп, нарықтағы бәсекенің күшейгенін көрсетті.
Сарапшылардың бағалауынша, IT нарығы Алматы мен Астанада шоғырланған күйінде қалып отыр, алайда өңірлерде де мамандар саны біртіндеп артып келеді.