Қазақстанда жұмыссыз азаматтарды оқыту жүйесіне виртуалды шындық (VR) технологиялары енгізіледі, деп хабарлайды QazMonitor ҚР Еңбек және халықты әлеуметтік қорғау министрлігіне сілтеме жасап.
Жаңа тәсіл кадрларды даярлау процесін жаңғыртып, қатысушыларға теориямен қатар нақты жұмыс жағдайына жақын ортада тәжірибе жинауға мүмкіндік береді. Министрлік мәліметінше, оқыту екі кезеңнен тұрады.
Алғашқы кезеңде азаматтар Skills Enbek цифрлық платформасы арқылы бес бағыттың бірі бойынша онлайн-курстардан өтеді. Оқу мемлекеттік және орыс тілдерінде қолжетімді.
Теориялық бөлімнен кейін қатысушылар Мансап орталықтарында оқуын жалғастырады. Бұл кезеңде VR-шлемдер қолданылып, тыңдаушылар кәсіби дағдыларын өндірістік ортаға барынша жақын жағдайда пысықтайды.
Бағдарламаны аяқтаған соң қатысушыларға сертификат беріледі. Құжат олардың платформадағы жеке кабинетінде автоматты түрде тіркеледі.
Пилоттық жоба Қонаев, Өскемен, Түркістан, Шымкент және Астана қалаларында іске асырылады. Елордада жобаны іске қосу сәуір айына жоспарланған, кейін ол кезең-кезеңімен басқа өңірлерге енгізіледі.
Ведомствоның мәліметінше, VR технологияларын қолдану еңбек нарығына бейімделуді жеделдетіп, жұмыс берушілер талаптарына сай практикалық дағдыларды қалыптастыруға мүмкіндік береді.