Қазақстанда электр және жылу энергетикасын цифрландыру аясында жаңа буын мамандарын даярлау жоспарланып отыр. Бұл бағытта «Энергетикадағы цифрландыру және жасанды интеллектіні қолдану» атты кәсіптік стандарт әзірленеді, деп хабарлайды QazMonitor.
Аталған стандарт шеңберінде бірқатар жаңа мамандықтар енгізіледі. Олардың қатарында зияткерлік («ақылды») желілерді жобалаушы, энергия жүйелеріне (Smart Grid) жасанды интеллектіні әзірлеу және енгізу жөніндегі инженер, сондай-ақ энергетикалық желілердің киберқауіпсіздігі бойынша маман бар.
Жаңа бағыттар Қазақстанның Жаңа мамандықтар мен құзыреттер атласы негізінде қалыптастырылған. Бұл шешімдер заманауи білім беру бағдарламаларын әзірлеуге және саланың цифрлық трансформация талаптарына сай кадрлар даярлауға мүмкіндік береді.
«Ақылды» желілерді дамыту алдағы 5-10 жылдағы негізгі басымдықтардың бірі ретінде қарастырылып отыр. Осыған байланысты мамандардан тек энергетика саласындағы білім ғана емес, сонымен қатар жасанды интеллект бағытындағы құзыреттер де талап етіледі. Болашақта диспетчерлік функциялардың бір бөлігі зияткерлік басқару жүйелеріне берілмек.
Айта кетейік, 2025 жылы салада «Смарт-менеджер» жаңа мамандығы енгізілген болатын. Ол энергетикалық жүйелерді басқару мен мониторинг тиімділігін арттыруға және зияткерлік технологияларды енгізуге бағытталған.
Жалпы, Қазақстанның электр және жылу энергетикасы цифрландыру, автоматтандыру және интеллектуалды шешімдерді енгізу сияқты жаһандық трендтерді ескере отырып дамып келеді.
Сонымен қатар салалық жұмыс тобы еңбек нарығының қазіргі және болашақтағы сұраныстарын ескере отырып, Салалық біліктілік шеңберін жаңартты. Бұл ретте функционалдық карта қайта қаралып, кәсіптік біліктілік талаптары өзектендірілді және кадрларға деген қажеттілікке талдау жүргізілді. Нәтижесінде жоғары, техникалық және кәсіптік білім беру ұйымдарында кадр даярлау жүйесімен үйлесімділік қамтамасыз етілді.