Павлодар облысында 109 қызметіне жасанды интеллект енгізу, деректерді өңдеу орталықтары үшін мамандар даярлау және өңірдегі ахуалдық орталықтарды бірыңғай жүйеге біріктіру ұсынылды. Бұл мәселелер Қазақстанның жасанды интеллект және цифрлық даму вице-министрі Бақтияр Мұхаметқалиевтің өңірге жұмыс сапары барысында талқыланды, деп хабарлайды QazMonitor.
Вице-министр Павлодар мен Екібастұз қалаларындағы цифрлық жобалармен танысып, стартаптар мен IT-қоғамдастық өкілдерімен кездесті. Сондай-ақ халықпен кездесу өткізіліп, өңірдің цифрлық трансформациясының негізгі бағыттары қаралды.
Pavlodar Hub алаңында өңірдің нақты мәселелерін шешуге бағытталған бірқатар технологиялық жоба таныстырылды. Мәселен, Barjok электр энергиясының ажыратылуын бақылауға арналған шешім болса, Ping! азаматтардың өтініштерін өңдеуге жасанды интеллект енгізуді көздейді. Ping! жобасын 109 қызметінде пилоттық режимде іске қосу мүмкіндігі қарастырылды.
Tekser мектептерге арналған цифрлық шешімдерді ұсынады. Қолданыстағы пилоттық жобаларды аяқтап, олардың нәтижесіне қарай ауқымын кеңейту ұсынылды. Dala Capital жобасы Real World Assets (RWA) бағыты бойынша жұмыс істейді. Оны Alatau City-мен бірлесіп одан әрі дамыту мүмкіндігі қарастырылды. Ал Qoldam тұрғын үй-коммуналдық шаруашылық саласындағы дебиторлық берешекпен жұмыс істеуге арналған. Жобаны Павлодарда іске қосып, практикалық тиімділігін бағалау ұсынылды.
Сонымен қатар Pavlodar Hub базасында жастар, IT-мамандар, стартаптар және өңірдің технологиялық қоғамдастығы үшін заманауи кеңістік құру мәселесі талқыланды.
Павлодар қаласының ахуалдық орталығының жұмысын жетілдіруге де назар аударылды. Мұнда жекелеген ақпараттық жүйелер мен мониторингтік панельдердің орнына өңірдегі жағдайды толық көрсететін бірыңғай басқару орталығын қалыптастыру ұсынылды. Ол өңірлік ақпараттық жүйелердің мүмкіндігінше көп санын біріктіруі тиіс.
Екібастұздағы қалалық және коммуналдық инфрақұрылымды мониторингтеу тәжірибесіне де ерекше назар аударылды. Нәтижесін көрсеткен шешімдерді облыстың басқа аумақтарына тарату ұсынылды.
Сондай-ақ ахуалдық орталықтың талдамалық мүмкіндіктерін күшейтіп, проблемаларды алдын ала болжау және басқарушылық шешімдерді қабылдауға қолдау көрсету үшін ЖИ құралдарын кезең-кезеңімен енгізу міндеті қойылды.
Өңірдің цифрлық трансформациясына ірі өнеркәсіптік кәсіпорындарды тарту да жоспарланып отыр. Кәсіпорындарда цифрландыруға жауапты басшыларды айқындап, цифрлық және ЖИ саласындағы жеке даму стратегияларын қалыптастыру ұсынылды.
Ірі бизнес өндірісін цифрландырумен ғана шектелмей, технологиялық жобаларды, кадрлар даярлауды және заманауи шешімдерді енгізуді қолдауға атсалысуы қажет. Осы мақсатта облыс әкімдігін, өнеркәсіптік кәсіпорындарды, IT-компанияларды, білім беру ұйымдарын және технологиялық қоғамдастықты біріктіретін Жасанды интеллектті дамыту жөніндегі өңірлік кеңес құру ұсынылды.
Кездесуде цифрлық экономикаға қажетті кадрларды даярлау мәселесі де көтерілді. Павлодар облысының экономикасы мен кәсіпорындардың болашақтағы мамандарға сұранысын ескере отырып, цифрлық дағдылар мен ЖИ бойынша өңірлік оқыту бағдарламасын қалыптастыру ұсынылды.
Бұл мәселе Екібастұз үшін ерекше өзекті. Қалада деректерді өңдеу орталықтарын орналастыру инфрақұрылымы дамып жатқандықтан, болашақта ДӨО-ларда, энергетика, IT және басқа технологиялық салаларда жұмыс істейтін мамандарды алдын ала даярлау бағдарламасын іске қосу ұсынылды.
Осылайша, Павлодар облысының цифрлық трансформациясы практикалық ЖИ шешімдерін енгізу, бірыңғай ахуалдық орталықты дамыту, стартаптарды қолдау, ірі кәсіпорындарды тарту және кадрларды жүйелі даярлау бағыттары бойынша жүргізілмек.
Негізгі қағидат – цифрлық жобалар өңірдің нақты қажеттіліктеріне негізделіп, тұрғындар, бизнес және мемлекеттік басқару үшін өлшенетін нәтиже беруі тиіс.