М.Әуезов атындағы Оңтүстік Қазақстан университетінің студенттері AI-Sana көрмесінде мал шаруашылығын цифрлық басқаруға арналған Smart Qora AI жүйесін таныстырды. Жоба жасанды интеллект арқылы малды есепке алу, орналасқан жерін бақылау және ветеринариялық шараларды басқаруға мүмкіндік береді, деп хабарлайды QazMonitor.
Жүйеде әр жануарға жеке цифрлық ID беріледі. RFID белгісі мен Smart Gate арқылы мал автоматты түрде тіркелсе, GPS және LoRaWAN құрылғылары оның жайылымдағы орналасуы мен қозғалысын бақылауға көмектеседі.
Smart Qora AI әр жануарға цифрлық профиль қалыптастырып, онда ветеринариялық шаралар туралы ақпарат сақтайды. Электрондық ветеринариялық паспортта вакцинация, диагностика және профилактикалық жұмыстардың тарихы көрсетіледі.
Жобаға жасанды интеллект негізіндегі бейнеаналитика да енгізілген. Камералар жануарларды анықтап, жоғалған немесе белгіленген аумақтан шығып кеткен малды тіркей алады. Сондай-ақ жүйе қозғалыс белсенділігіндегі қалыптан тыс өзгерістерді анықтап, фермерлер мен жауапты мамандарға ескерту жібереді.
Барлық дерек бір платформада жинақталып, AI-аналитика модулі оларды өңдейді. Фермер веб және мобильді интерфейс арқылы шаруашылықты қашықтан бақылап, қажетті есептерді автоматты түрде қалыптастыра алады.
Авторлардың айтуынша, болашақта Smart Qora AI-ды мемлекеттік ақпараттық жүйелермен интеграциялау жоспарланған. Жоба мал шаруашылығындағы есеп пен бақылауды жеңілдетіп, шаруашылықты деректерге сүйене отырып басқаруға мүмкіндік беретін цифрлық құрал ретінде ұсынылды.