Қарағандыда ауыл шаруашылығына арналған жаңа технологиялық шешім әзірленді. Әбілқас Сағынов атындағы Қарағанды техникалық университетінің түлектері мен қызметкері негізін қалаған AgroSky стартапы шаруалардың су, тыңайтқыш және жанармай шығындарын үштен біріне дейін төмендетуге, ал өнімділікті айтарлықтай арттыруға мүмкіндік беретін дрондар мен жасанды интеллектке негізделген жүйе ұсынып отыр.
Жобаның басты артықшылығы – егістік жағдайын дәлдікпен талдайтын деректер. Арнайы дрондар алқаптарды жүйелі сканерлеп, мультиспектрлі бейнелер жинайды, ал платформадағы жасанды интеллект бұл мәліметті өңдеп, проблемалы учаскелерді анықтайды. Алгоритмдер тыңайтқыштардың қажет мөлшерін есептеп, суару бойынша жеке ұсынымдар қалыптастырады. Мұндай тәсіл ресурстарды тек қажетті аймақтарға бағыттап, шығынды азайтуға мүмкіндік береді.
Алдын ала жүргізілген есептеулер технология су, тыңайтқыш және жанармай шығындарын шамамен 30%-ға төмендетіп, өнімділікті 10-15% арттыра алатынын көрсетіп отыр. Жүйе биыл алғашқы далалық сынақтардан өтіп, тиімділігін дәлелдей бастады.
«Жартас ауылы маңындағы алқаптарда мультиспектрлі деректер жинау үшін ғылыми-тәжірибелік әуебақылау жүргіздік. Алынған материалдар негізінде егістіктің нақты жағдайын көрсететін карта әзірледік. Ол топырақтағы фосфор, азот, калий, көміртек шоғырлануын және агростресс байқалған аймақтарды анықтап берді. Бұл деректер жабдықты калибрлеу мен алгоритмдерді жетілдіру үшін қажет болды», – дейді жобаның ғылыми жетекшісі Дмитрий Ожигин.
2025 жылдың көктемінде AgroSky халықаралық деңгейде танылып, GCIP 2025 (Global Cleantech Innovation Programme) бағдарламасына өтініш берді. Стартап менторлық қолдауға, оқыту бағдарламаларына және сараптамалық бағытқа қол жеткізді.
Іріктеу кезеңдерінде инновация, экологиялық тиімділік, масштабталу мүмкіндігі және технологиялық дайындық қатаң бағаланды. 250-ге жуық өтініш арасынан AgroSky GCIP-Kazakhstan бағдарламасына өткен 50 үздік жобаның қатарына енді.
«Акселераторға қатысу бізге үлкен серпін берді. Гипотезаларымызды тексеріп, өнімді жетілдіріп, сарапшылардан бағалы ұсыныстар алдық. Ең бастысы, жобаның дамуына арналған нақты стратегия қалыптастырдық», – деп атап өтті команда жетекшісі.
Дереккөз: Қарағанды облысының әкімдігі