Алатау қаласында LED-дисплей өндіретін зауыт ашылады. «Alatau Invest 2025» халықаралық бизнес-форумы аясында облыстың Кәсіпкерлік және индустриалды-инновациялық даму басқармасы мен дисплей технологиялары нарығындағы әлемдік көшбасшы BOE Technology Group Co., Ltd. арасында ынтымақтастық туралы меморандумға қол қойылды.
Алматы облысының Өңірлік даму орталығының директоры Акжол Исақов жобаның аймақ пен Алатау үшін маңыздылығын атап өтті.
«BOE секілді алып компанияның келуі – өңір үшін үлкен жетістік және Алатау қаласының цифрлық дамуына жасалған маңызды қадам. Біз инвесторға алаңдар ұсыну және жобаны сүйемелдеу бағытында ауқымды жұмыс атқардық. Жоғары технологиялық өндірістің іске қосылуы жаңа жұмыс орындарын ашып қана қоймай, өңірдің технологиялық инфрақұрылымын едәуір күшейтеді. Бұл жоба Қазақстандағы электронды өнеркәсіптің өсу нүктесіне айналады», – деді ол.
Әлемдік деңгейдегі зауыттың дәл Алатауда орналасуы облыстың жаңа индустриалды экожүйесін қалыптастырудағы маңызды қадамға айналады, деп есептейді әкімдікте.
Сонымен қатар заманауи логистика, инженерлік желілер, көліктік қолжетімділік және білікті кадрлардың болуы жобаны жедел іске қосуға және оған қатысты салалардың дамуына мүмкіндік береді.
Дереккөз: Алматы облысы әкімдігі