Қазақстанда мемлекеттік қызмет көрсету саласында нағыз технологиялық өзгеріс болды. 2025 жылдың қорытындысы бойынша eGov Mobile мобильді қосымшасы қазақстандықтар үшін мемлекетпен байланыс орнатудың негізгі арнасына айналды, деп хабарлайды QazMonitor.
2025 жылдың басынан бері ел азаматтары онлайн форматта 51,5 млн-нан астам қызмет алса, оның тең жартысы смартфондағы қосымшалар арқылы жүзеге асырылған. Бүгінде еліміздегі мемлекеттік қызметтердің 90%-ы онлайн форматта қолжетімді болып, халықтың уақытын үнемдеу мен бюрократияны жоюдың жаңа деңгейіне жол ашты.
«eGov.kz порталының тіркелген пайдаланушыларының саны 15,1 млн адамнан асады, оның ішінде 610 мың пайдаланушы ағымдағы жылдың басынан бері қосылған», делінген Жасанды интеллект және цифрлық даму министрлігі таратқан ақпаратта.
Ведомство мәліметінше, негізгі тренд мобильділік болып отыр. Бүгінде eGov Mobile қосымшасын 11,7 млн адам пайдаланады, ал оның күнделікті белсенді аудиториясы 671 мыңнан астам адамды құрап отыр.
2025 жылы азаматтар үшін 220 цифрлық сервис пен мемлекеттік қызмет қолжетімді болды. Дәстүрлі анықтамалардан бөлек, қазақстандықтар заманауи құралдарды да белсенді меңгеріп жатыр. Ең сұранысқа ие сервистердің қатарында банктік қарыздар мен микрокредиттер алудан ерікті түрде бас тарту, соттылығының бар немесе жоқ екендігі туралы анықтама, сондай-ақ заңды тұлғаның тіркеу әрекеттері туралы анықтамалар болған.
Сонымен қатар, министрлік маусым айынан бастап іске қосылған «Заң және Тәртіп» сервисі азаматтардың құқық қорғау органдарымен қарым-қатынасын түбегейлі өзгерткенін атап өтті. Енді кез келген құқық бұзушылық туралы хабарламаны ешқайда бармай-ақ немесе қоңырау шалмай-ақ жедел жолдауға болады.
Бұдан бөлек, 2025 жылдың тамыз айында eGov Mobile тарихындағы ең ірі жаңарту жүзеге асты. Жүйеге жасанды интеллект технологияларына негізделген eGov AI интеллектуалды іздеу жүйесі енгізіліп, пайдаланушылардың сұраныстарына жауап беру жылдамдығы мен сапасы артты.
Технологиялық дамумен қатар, ақпараттық қауіпсіздік мәселесі де басты назарда. Қазан айынан бастап алаяқтардан қорғану үшін авторизациялау тәртібі күшейтілді.
«Енді электрондық цифрлық қолтаңбаны (ЭЦҚ) пайдалана отырып жүргізілетін авторизацияның бірінші кезеңінен кейін пайдаланушы 1414 нөмірінен жіберілетін SMS-код арқылы жеке басын растауы қажет», деп қосты министрлік.
Бұл өзгерістер eGov.kz порталына, сондай-ақ оның құрамдас бөліктеріне (eOtinish сервисі, «Ашық үкімет» порталы) қатысты. Сонымен қатар, пайдаланушылардың ыңғайлылығы үшін логин мен пароль арқылы кіру мүмкіндігі де қолжетімді: пайдаланушы ЖСН/БСН мен құпиясөзді енгізеді, ал жеке басын растау ЭЦҚ көмегімен жүзеге асырылады.
Ведомство 2025 жылдың нәтижелері Қазақстанның «цифрлық мемлекет» ретіндегі позициясын нығайтқанын көрсетеді деп есептейді. Мемлекеттік қызметтердің қолжетімділігі тек жайлылық емес, сонымен қатар ашықтықты қамтамасыз ету мен экономикалық тиімділікті арттырудың кепіліне айналған. Алдағы уақытта жасанды интеллект мүмкіндіктерін кеңейту және дербес деректерді қорғау тетіктерін одан әрі жетілдіру басты басымдық болып қалады.