Ұлыбританияда өтіп жатқан Bett UK 2026 халықаралық көрмесінде Қазақстанның ұлттық павильоны ресми түрде таныстырылды. Көрмеге ҚР Ғылым және жоғары білім министрі Саясат Нұрбек қатысып, жетекші университеттер, ғылыми орталықтар мен жаһандық технологиялық компаниялардың өкілдерімен бірқатар іскерлік кездесулер өткізді, деп хабарлайды QazMonitor.
Bett UK - білім беру технологиялары саласындағы ең ірі халықаралық платформалардың бірі. Бұл алаңда білім беру жүйесін цифрландыру, жасанды интеллектіні оқу процесіне енгізу, инновациялық шешімдерді қолдану және білімнің болашағына қатысты негізгі трендтер талқыланады.
21 қаңтарда Лондонда ҚР Ғылым және жоғары білім министрлігінің ұйымдастыруымен Қазақстанның ұлттық павильоны ашылды. Экспозиция жоғары және жоғары оқу орнынан кейінгі білім беру жүйесін дамытудың басым бағыттарын көрсетуге арналды. Павильонда білім беру процестерін цифрландыру, жасанды интеллектке негізделген шешімдер, ғылыми зерттеулерді дамыту және халықаралық академиялық ынтымақтастықты кеңейту бағыттары ұсынылды.
Ұлттық павильон жұмысына Қазақстанның 9 жоғары және жоғары оқу орнынан кейінгі білім беру ұйымы қатысты. Олар академиялық бағдарламаларын, ғылыми-зерттеу жобаларын, сондай-ақ шетелдік серіктестермен бірлескен білім беру және ғылыми бастамаларды іске асыру мүмкіндіктерін таныстырды. Экспозиция отандық университеттердің ғылыми-білім беру әлеуетін және халықаралық ынтымақтастыққа дайын екенін көрсетті.
Көрме аясында пленарлық сессиялар, тақырыптық пікірталастар, жетекші EdTech әзірлемелерінің таныстырылымдары және мемлекет, университеттер мен технологиялық компаниялар арасындағы іскерлік кездесулер өтіп жатыр.