«ПҚОП» ЖШС (Шымкент мұнай өңдеу зауыты) каталитикалық риформинг қондырғысында катализатордың белсенділігін қалпына келтіруге бағытталған жоспарлы іс-шараларды бастайтынын хабарлады. «Қазмұнайгаз» мәліметінше, бұл – екі жыл бойы пайдаланылған катализатор үшін міндетті және қалыпты регенерацияаралық процедура, деп хабарлайды QazMonitor.
Жұмыстардың ұзақтығы 7 тәулікке дейін созылады және бұл мерзім катализатор жүйесін әзірлеуші кәсіпорынмен келісілген. Зауыт өкілдерінің айтуынша, регенерация мұнай өнімдерінің өндірісіне және ішкі нарықтағы теңгерімге әсер етпейді – жөнелту штаттық режимде жалғасады.
Компания таратқан ақпаратқа сәйкес, қазіргі таңда Қазақстандағы негізгі мұнай өнімдерінің қоры төмендегідей:
АИ-92 – 354,2 мың тонна (28 тәулікке жетеді);
АИ-95 – 91,8 мың тонна (25 тәулікке жетеді);
дизель отыны – 400 мың тонна (31 тәулікке жетеді);
авиаотын – 114,9 мың тонна.
Бұдан бөлек, Шымкент МӨЗ жоспарлы жұмыстар кезеңіне арнап тауарлық мұнай өнімдерінің қосымша қорын алдын ала қалыптастырған. Оның ішінде:
автобензин – 24,3 мың тонна
АИ-92 – 21,2 мың тонна;
АИ-95 – 3,1 мың тонна;
дизель отыны – 4,9 мың тонна;
авиаотын – 5 мың тонна;
сұйытылған газ – 700 тонна бар.
Компания мәліметінше, бұл қорлар ішкі нарықты тұрақты қамтамасыз етуге және маусымдық тәуекелдерді болдырмауға жеткілікті.