Түркістан облысының әкімі Нұралхан Көшеров шетелдік инвестормен кездесіп, өңірде халықаралық деңгейдегі аквапарк салу жобасын талқылады. Жоба Түркістан қаласында ірі демалыс және туристік кешен қалыптастыруды көздейді, деп хабарлайды QazMonitor.
Инвестор ұсынған жоспарға сәйкес, аквапарк кешенінің жалпы аумағы 120 мың шаршы метрден асады. Кешен құрамына су аттракциондары бар аквапарк аймағы, кемпинг форматындағы қонақ үй, қабылдау орталығы мен банкет залы кіреді. Жоба отбасылық демалыс инфрақұрылымын дамытуға және туристік ағынды ұлғайтуға бағытталған.
Жобаның негізгі ерекшелігі – жыл бойы жұмыс істеуге бейімделген инфрақұрылым. Аквапарктағы су айдыны жаз мезгілінде шомылу аймағы ретінде пайдаланылса, қысқы кезеңде картинг жолына айналады. Бұл шешім кешеннің маусымаралық кезеңде де табысты жұмыс істеуіне мүмкіндік береді.
Келушілер үшін биік сырғанақтар, торнадо үлгісіндегі аттракциондар, аква-қамал, кемпірқосақ сырғанағы және интерактивті ойын аймақтары қарастырылған.
Жаңа туристік нысан Түркістан өңірімен қатар, еліміздің өзге облыстарынан және шетелден келетін туристерге бағытталады. Өңір әкімдігінің мәліметінше, жоба іске асқан жағдайда жаңа жұмыс орындары ашылып, өңірдің туристік тартымдылығы артады.
Кездесу барысында тараптар өзге де инвестициялық бастамаларды талқылады. Атап айтқанда, «Turan» арнайы экономикалық аймағында жаңа өндіріс орындарын іске қосу мүмкіндіктері қарастырылды.