Жүргізілген тексеру театрдың құрылымдары мен инженерлік жүйелерінің қатты тозып, ғимараттың қанағаттанарлықсыз жағдайда екенін және толықтай жаңғыртуды қажет ететінін көрсеткен, деп хабарлайды QazMonitor Алматы қаласы әкімдігінің баспасөз қызметіне сілтеме жасап.
Ең үлкен қауіп қасбет бөлігінде тіркелген. Мәрмәр мен қаптау элементтері бұзылып, адамдар көп жиналатын аумақта құлау қаупін тудырған. Осыған байланысты ғимараттың қауіпті элементтері алынып, қайта қалпына келтіру жұмыстары басталған.
Алматы қаласы Құрылыс басқармасы басшысының орынбасары Дәулет Еламановтың айтуынша, театрдың негізгі сәулеттік белгілері толық сақталады. Мәрмәр қаптамалар, гранит жабындары мен люстралар ауыстырылмай, қалпына келтіріледі.
Сонымен қатар жоба аясында балалар мен жастарға арналған шығармашылық кеңістіктері бар және заманға сай сахнамен жабдықталған қосымша корпус салу көзделген. Жаңғырту жұмыстары театрдың қауіпсіздігін арттырып, мәдени нысанды заманауи талаптарға сәйкестендіруге бағытталған.