Үкіметтің кеңейтілген отырысында Премьер-министр Олжас Бектенов соңғы 9 айда тікелей шетелдік инвестициялар көлемі $1,5 млрд-қа немесе 10,9 пайызға өсіп, $14,9 млрд-ты құрағанын айтты, деп хабарлайды QazMonitor.
Жалпы портфельдік инвестициялар мен несиелік қаражаттарды қоса есептегенде, Қазақстан экономикасына тартылған шетелдік инвестициялардың жалпы көлемі $58 млрд-тан асты.
Сонымен қатар негізгі капиталға салынған инвестициялар 13 пайызға өсіп, 22,7 трлн теңгеге жетті. Оның ішінде мемлекеттік инвестициялар 800 млрд теңгеге артып, 5 трлн теңгені құраса, жекеменшік инвестициялар 2,4 трлн теңгеге ұлғайып, 17,7 трлн теңгеге жеткен.
Отырыста 2025 жылы жалпы құны $115 млрд болатын 212 жоба бойынша проблемалық мәселелер шешілгені айтылды.
Премьер-министр Президент тапсырмаларына сәйкес инвесторларды тарту жүйесі жетілдіріліп жатқанын атап өтті. Инвестициялық жобалар басталған сәттен бастап құрылысы толық аяқталғанға дейін «жасыл дәліз» қағидасы бойынша сүйемелденеді.
Атап айтқанда, Президент Жарлығымен инвестициялық омбудсменнің функциялары Бас прокурорға жүктеліп, прокурорлық қадағалау инвесторлардың құқықтық қорғалуын күшейтуге мүмкіндік берген. Сонымен қатар «Бәйтерек» холдингі Қазақстанда ірі жобаларды іске асыруға мүдделі инвесторларды проактивті түрде тартуға кірісті. Инвестиция тартудың сыртқы бағытын нығайту үшін инвестициялық әлеуеті жоғары елдерде Kazakh Invest компаниясының шетелдік өкілдіктері ашу жоспарланып отыр.
Сондай-ақ Мемлекет басшысының бастамасымен құрылып жатқан Алатау Сити қаласы инвестиция тартудың жаңа орталығына айналмақ. Қазіргі уақытта Конституциялық заң жобасында ерекше құқықтық режим енгізу, заманауи басқару және қала құрылысы стандарттарын қалыптастыруға бағытталған нормалар қарастырылған.