Жоба ASTRASEC PTE. LTD және «Qubitera» компаниялары серіктестігімен жүзеге асырылуда және ұлттық кванттық экожүйені қалыптастыруға бағытталған, деп хабарлайды QazMonitor.
Орталық іргелі және қолданбалы зерттеулер жүргізіп, кванттық қорғалған байланыс пен есептеу шешімдерін дамытуға, сондай-ақ жаңа буын мамандарын даярлауға басымдық береді. Сонымен қатар халықаралық тәжірибені трансферлеу, бірлескен ҒЗТКЖ жобалары мен технологиялық стартаптарды іске қосу жоспарланған.
Бірінші кезеңде кванттық криптография және кванттық байланыс зертханасы іске қосылды. Ол заманауи фотондық жүйелермен және оқу-тәжірибелік инфрақұрылыммен жабдықталған.
Ғылым және жоғары білім министрі Саясат Нұрбек жобаның цифрлық және технологиялық қауіпсіздікті күшейтуге, инновациялық экономиканы дамытуға бағытталған мемлекеттік басымдықтарға сәйкес келетінін айтты.
Университет ректоры Жансейіт Түймебаев орталықтың ашылуы ҚазҰУ-ды зерттеу университеті ретінде дамыту стратегиясының бір бөлігі екенін атап өтті.
Салтанатты іс-шара аясында ұлттық кванттық экожүйені дамыту мәселелеріне арналған дөңгелек үстел өтті. Қатысушылар кванттық киберқауіпсіздік, индустриялық серіктестік және зияткерлік меншікті қорғау бағыттарын талқылады.
Кванттық технологиялар не үшін қажет?
Кванттық технологиялар ақпаратты өңдеуді түбегейлі жеделдетуге мүмкіндік беріп, классикалық құралдардан айтарлықтай асып түседі. Кванттық компьютерлер бір мезгілде 0 және 1 мәндерін қабылдай алатын кубиттерді немесе кванттық биттерді пайдаланады. Бұл күрделі есептерді (мысалы, молекулаларды модельдеу) кәдімгі компьютерлерге қарағанда геометриялық прогрессиямен жылдам шешуге мүмкіндік береді.
Кванттық коммуникациялар деректерді фотондар арқылы тасымалдауға негізделген. Физика заңдарының, дәлірек айтсақ, күйді өзгертпей оны өлшеудің мүмкін еместігінің арқасында мұндай байланыс арналарын байқатпай тыңдау мүмкін емес. Кванттық датчиктер мен метрология аса дәл өлшемдер жүргізу үшін кванттық жүйелердің сыртқы әсерлерге жоғары сезімталдығын пайдаланатын аспаптарды қамтиды.
Екінші кванттық революция жекелеген кванттық объектілерді - атомдарды, фотондарды, элементарлық бөлшектерді басқаруға бағытталған. Кванттық технологиялардың дамуы жаңа материалдар мен дәрі-дәрмектерді модельдеуге, сондай-ақ ақпаратты беру мен өңдеу тәсілдерін түбегейлі өзгертуге жол ашады.