Еліміздің ғалымдары семіздік, 2 типті қант диабеті және жүрек-қан тамырлары ауруларын алдын алуға арналған диеталық құрғақ таңғы ас өндірісінің инновациялық технологиясын әзірлеу жұмыстарын аяқтады, деп хабарлайды QazMonitor.
Жоба бір уақытта халықтың тамақтану сапасын жақсарту және функционалды, диеталық өнімдер сегментінде импортты алмастыру сияқты екі стратегиялық мәселені шешуге бағытталған.
Мамандардың айтуынша, қазіргі кезде көптеген адамдардың рационы рафинадталған көмірсуларға бай, ал тағамдық талшықтар, витаминдер мен минералдық заттар жетіспейді. Бұл мәселе әсіресе құрғақ таңғы ас нарығында айқын көрінеді, себебі негізгі бөлігі қант мөлшері жоғары және биологиялық құндылығы төмен импорттық өнімдерден тұрады.
Жаңа технология отандық дәнді шикізатты қолдануға және дәннің құрамдас бөліктерін сақтау қағидатына негізделген. Өнімдегі тағамдық талшықтар, В тобы дәрумендері мен минералдық элементтер мөлшері артып, энергетикалық тығыздық төмен болады. Қолданыстағы нарықтағы баламалардан айырмашылығы, жаңа құрғақ таңғы ас диеталық және профилактикалық тамақтану бөлігі ретінде ұсынылады, көмірсу алмасуын қалыпқа келтіруге, асқазан-ішек жолдарының жұмысын жақсартуға және дене салмағын бақылауға септігін тигізеді.
Бүгінгі күнге дейін өнімнің дайындалу тәсілі мен өндіріс технологиясы әзірленді. Келер жылы өнімді нарыққа шығару жоспарлануда.