Қазіргі кезде солтүстіктегі ірі су қоймалары орта есеппен 70%-ға, орталықта – 68%-ға толған. Батыста бұл көрсеткіш 48%, шығыста 86% құрайды, деп хабарлайды QazMonitor. Еліміз бойынша ірі су қоймаларындағы жалпы бос сыйымдылық 14,3 млрд текше метрден асады. Күтілетін су көлемі 9,1-13,9 млрд текше метр шамасында болжанып отыр.
Ресей Федерациясымен су тасқыны кезеңіндегі өзара іс-қимыл үшін арнайы жұмыс тобы құрылған. Алдын ала деректерге сәйкес, тасқын кезінде Ирикла су қоймасынан секундына 200 текше метрден аспайтын көлемде су жіберіледі. Қытаймен трансшекаралық сулардың сапасын бақылау және жедел ақпарат алмасу жүйесі жұмыс істеп тұр.
Гидротехникалық нысандарға тексерулер жүргізіліп, 39 нысанда жөндеу жұмыстары атқарылды. Атап айтқанда, Абай облысындағы Шар, Шымкенттегі «Ақжар», Ақтөбе облысындағы «Шолақ» су нысандарында күрделі жөндеу аяқталды. Қостанай облысындағы Степное ауылында бөгет реконструкцияланды. 2025 жылы 56 гидротехникалық нысан көпфакторлы тексеруден өтті.
10 облыста коммуналдық гидротехникалық нысандарды басқаратын 16 мамандандырылған ұйым құрылды. Қазір олар 846 нысанға қызмет көрсетіп, 1193 адамды жұмыспен қамтып отыр.
Сонымен қатар 2025-2027 жылдарға арналған Жол картасы аясында өзен арналары тазартылып, тереңдетілуде. Бүгінге дейін 166,98 шақырым өзен арнасы ретке келтірілді. Биыл алты облыста жалпы ұзындығы 192,55 шақырым учаскеде жұмыстар жүргізу жоспарланған.
Су ресурстары және ирригация бірінші вице-министрі Нұрлан Алдамжаровтың айтуынша, су қоймаларының жұмыс режимі әр 10 күн сайын қайта есептеледі, арнайы техника мен материалдар дайындалған.