Қазақстанның Денсаулық сақтау министрлігі «Десилмакс» препаратын қолданыстан шығару туралы шешім қабылдады, деп хабарлайды QazMonitor.
Медициналық және фармацевтикалық бақылау комитеті төрағасының бұйрығына сәйкес, Үндістанда шығарылған ерлерге арналған дәріні медициналық мақсатта қолдануға тыйым салынды және айналымнан жинап алу тапсырылды.
Бұйрық негізінде комитеттің аумақтық бөлімшелеріне, «СК-Фармация» мен Әлеуметтік медициналық сақтандыру қорына шұғыл хабарлама жіберілді.
Енді мамандар бір жұмыс күні ішінде аталған дәрінің нарықта сатылуын тоқтатуы тиіс. Аталған препаратқа неліктен тыйым салынғаны айтылмады.