2026 жылғы 1 наурыздағы жағдай бойынша мемлекеттік еңбек инспекторлары республиканың 102 кәсіпорнын тексеріп, 408 жұмыскерге 284 млн теңгеге жалақы бойынша берешек бар екенін анықтады, деп хабарлайды QazMonitor. Сонымен қатар, түрлі ұйымдарда жүргізілген тексерулер барысында еңбек құқығы бұзылуының 1 мыңнан астам фактісі тіркелді.
Жалақы бойынша берешегі және еңбек құқығының бұзылуы анықталған кәсіпорындардың басшыларына 707 орындауға міндетті ұйғарым берілді, сондай-ақ 89 млн теңгеден астам сомаға айыппұл салынды.
Қабылданған шаралардың, оның ішінде берешекті өтеудің қатаң кестелері мен мерзімдерін белгілеудің нәтижесінде 354 жұмыскердің құқықтары қорғалып, оларға жалпы 253 млн теңге төленді.
Еңбек заңнамасының сақталуына мемлекеттік бақылау ҚР Еңбек және халықты әлеуметтік қорғау министрлігінің ерекше бақылауында. 2026 жылғы 1 наурыздағы деректер бойынша мемлекеттік еңбек инспекторлары 1125 тексеру жүргізіп, оның барысында 1228 бұзушылық анықталды. Оның ішінде:
еңбек саласында – 1055;
еңбек қауіпсіздігі және еңбекті қорғау бойынша – 161;
халықты жұмыспен қамту бойынша – 12.
Қабылданған шаралардың нәтижесінде барлығы 11 354 жұмыскердің еңбек құқығы қорғалды.