Біріккен Араб Әмірліктерінен ұшатын халықаралық рейстер біртіндеп қайта жанданып жатыр. Алайда әуе қатынасы әзірге шектеулі режимде жүзеге асырылуда, деп хабарлайды QazMonitor.
Әуе тасымалдаушыларының мәліметінше, Дубайдағы хабтан әзірге 82 бағыт бойынша рейстер орындалады. Дегенмен Дубай арқылы транзитпен ұшатын жолаушылар тек келесі рейсіне билеті расталған жағдайда ғана сапарын жалғастыра алады.
Ал Абу-Дабиде орналасқан әуе компаниясы 19 наурызға дейін шектеулі рейс кестесі енгізілетінін хабарлады. Осы кезеңде шамамен 70 бағыт бойынша ұшулар жүзеге асырылады. Олардың қатарында Франкфурт, Лондон және Париж бағыттары бар.
Сонымен бірге аймақтағы қауіпсіздік жағдайы әлі де тұрақсыз күйінде қалып отыр. Мәселен, өңірден азаматтарды эвакуациялау үшін жіберілген Air France чартерлік рейсі зымырандық шабуылдарға байланысты кері бұрылуға мәжбүр болған.