Қазақстанда көктемгі су тасқынының белсенді фазасына дайындық аясында Төтенше жағдайлар министрлігінің жедел штабы 24/7 жұмыс режиміне ауысты. Негізгі күш пен ресурс тәуекел жоғары бес өңірге бағытталып отыр, деп хабарлайды QazMonitor.
«Қазгидромет» РМК болжамды деректеріне сәйкес, Солтүстік Қазақстан, Ақмола, Қарағанды, Шығыс Қазақстан және Абай облыстары су тасқыны қаупі жоғары негізгі аймақтар болып анықталды.
Төтенше жағдайлардың алдын алу комитетінің төрағасы Серік Жүнісбековтің хабарлауынша, 1 наурыздан бастап құрамына бірнеше министрлік (Су ресурстары, Экология, Көлік, Денсаулық сақтау және т.б.) өкілдері кіретін Ведомствоаралық жедел штаб құрылды. Штаб мүшелері су басу қаупі бар елді мекендердің гидрологиялық жағдайына сағат сайын мониторинг жүргізуде.
Инженерлік жоспарлар аясында еліміз бойынша 831 км қорғаныш бөгендері тұрғызылып, 1 128 км дренаж жүйелері мен каналдар жөнделді. Бұл шаралар 736 елді мекен үшін су басу қаупін айтарлықтай азайтуға мүмкіндік берді.
Сонымен қатар, өзендердегі мұз кептелістерін болдырмау үшін жалпы ауданы 243 мың м² болатын 106 учаскеде жарылыс жұмыстары жүргізілді.
Биыл су тасқынын модельдеу үшін Tasqyn ақпараттық жүйесі қолданылып жатыр. Қазірдің өзінде Ақмола, Қарағанды, Ақтөбе және Абай облыстарының 30 елді мекені бойынша ықтимал сценарийлер есептелген. 10 өңірде әуеден барлау жұмыстары жалғасып жатыр.