Биылғы жылдың 2 айында Қазақстанда интернет алаяқтық көрсеткіші азайғаны байқалады, деп хабарлайды QazMonitor.
Бас прокуратура мәліметінше, биыл интернет-алаяқтықтар саны 8,3%-ға төмендеген (4 385-тен 4 023-ке дейін), алайда 913 адам қылмыстық жауапкершілікке тартылды.
Сонымен қатар кибералаяқтықтарды ашу көрсеткіші 29%-ға өскен (36,5%-дан 66%-ға дейін), келтірілген залалды өтеу деңгейі 57%-ды құрады (3,4 млрд теңгенің 1,9 млрд теңгесі өтелді).
Прокуратура органдары ІІМ-мен бірлесіп, дропперлік схемаларды анықтау бойынша белсенді жұмыс жалғастырып жатыр. Қазақсатнда дропперлік үшін жауапкершілік енгізілген сәттен бастап бойынша 400-ден астам іс тіркеліп, оның 66-сы сотқа жолданды.
Сонымен қатар, алаяқтар пайдаланатын SIM-карталар мен WhatsApp аккаунттарын белсендірушілердің қызметі тоқтатылып жатыр. Мәселен, ағымдағы жылдың ақпан айында Батыс Қазақстан облысында алаяқтарға көмектескен тұлға 6 жылға бас бостандығынан айырылды. Ол өз атына мыңнан астам SIM-картаны рәсімдеп, оларды қылмыстық мақсатта пайдалану үшін алаяқтарға берген.
Сондай-ақ «сұр провайдерлерге» ерекше назар аударылуда, олар алаяқтарды виртуалды байланыспен қамтамасыз етеді. Мысалы, осы жылдың қаңтар айында Қостанай облысында жалған байланыс операторының технигі шетелдік алаяқтық колл-орталықтарға IP-телефония қызметін көрсеткені үшін 7 жылға бас бостандығынан айырылды.