2026 жылдың басынан бері Қазақстанда 36,1 мың азамат Skills Enbek кәсіптік оқыту платформасында онлайн курстарды аяқтап, сертификат алған. Олардың ішінде 16,7 мыңға жуығы – жұмыссыздар, деп хабарлайды QazMonitor.
Еңбек ресурстарын дамытуға бағытталған цифрлық платформада бүгінгі таңда 1,3 млн-нан астам пайдаланушы тіркелген. Тек 2026 жылдың өзінде 56,8 мың адам жүйеге жаңадан қосылған.
Ресми дерекке сәйкес, оқуды аяқтаған жұмыссыз азаматтардың басым бөлігі өңірлерге тиесілі. Атап айтқанда, Шымкент қаласында – 2 172 адам, Ақтөбе облысында – 2 125, Түркістан облысында – 1 446, Қызылорда облысында – 1 342 және Қостанай облысында – 1 304 адам сертификат алған. Сонымен қатар, қатысушылардың шамамен 4 мыңы 16–35 жас аралығындағы жастар.
Қазіргі уақытта платформада 581 курс қолжетімді, оның 395-і тегін. Курстардың ұзақтығы 2 сағаттан 72 сағатқа дейінгі аралықты қамтиды. Оқу бағдарламалары әлеуметтік қызмет көрсету, қаржылық сауаттылық және қызмет көрсету салаларына бағытталған.
2026 жылдың алғашқы тоқсанында ең көп сұранысқа ие курстар қатарында «Кассир» (4 047 сертификат), «Қаржылық сауаттылық негіздері» (1 994), сондай-ақ мүмкіндігі шектеулі азаматтарды сүйемелдеуге арналған кәсіби курс (1 422) болды.
Платформа Fluent Education және Яндекс Қазақстан сияқты серіктестердің білім беру өнімдерін де ұсынады, бұл пайдаланушыларға оқуын жалғастыруға мүмкіндік береді.