Қазақстанда балаларға қатысты зорлық-зомбылық, қатыгездік пен жәбірлеу деректеріне дер кезінде әрекет етудің бірыңғай ведомствоаралық алгоритмі бекітілді. Бірлескен бұйрық «Құқық бұзушылық профилактикасы туралы» заңды іске асыру аясында қабылданды, деп хабарлайды QazMonitor.
Құжатта алғаш рет полиция, білім беру ұйымдары, медицина қызметкерлері мен қорғаншылық органдарының жауапкершілік аясы нақты бөлінді. Енді бала құқығының бұзылуы туралы кез келген ақпарат белгіленген мерзімдер мен жауапты тұлғалар бекітілген міндетті іс-қимылдар тізбегін іске қосады.
Жүйенің басты жаңалығы – әрбір жағдай үшін дербес жауапкершілікті қамтамасыз ететін кейс-менеджерлер институтының енгізілуі. Әрбір анықталған оқиға бойынша арнайы маман бекітіліп, ол барлық қызметтердің жұмысын үйлестіреді және баланың құқығы толық қалпына келгенше қолдау көрсетеді. Бұл тәсіл ведомстволар арасындағы жауапкершіліктің иесіз қалуын болдырмай, зардап шеккен балаға үздіксіз көмек көрсетуге мүмкіндік береді.
Қағидада әрекет етудің нақты мерзімдері де алғаш рет бекітілді. Атап айтқанда, ақпарат құзырлы органдарға дереу жеткізіліп, 1 сағат ішінде бала құқықтарын қорғау органына жолданады. 1 жұмыс күні ішінде кейс-менеджер тағайындалып, баланың өмір сүру жағдайы тексеріледі. Ал материалдарды кәмелетке толмағандар істері жөніндегі комиссияға тапсыру мерзімі 3 жұмыс күнінен аспайды.
Енді ресми өтініштермен қатар, балалардың өздерінен түскен сигналдар, «111» байланыс орталығының мәліметтері, сондай-ақ әлеуметтік желілер мен БАҚ мониторингі нәтижелері де әрекет етуге негіз болады. Оқиғаларды анықтауға мобильді топтар мен психологиялық қолдау орталықтары да тартылған.
Балаларға көмек бірыңғай стандарт бойынша көрсетіледі. Ол медициналық, психологиялық, педагогикалық, әлеуметтік және құқықтық қолдаудың толық пакетін қамтиды. Сонымен қатар, мемлекеттік қорғау мен міндетті сүйемелдеу енді тек зорлық-зомбылық көрген балаларға ғана емес, сондай жағдайға куә болған балаларға да беріледі.