Қазақстан Республикасы Еңбек және халықты әлеуметтік қорғау министрлігі арнаулы әлеуметтік қызметтер көрсететін ұйымдарда интеллектуалды бейнебақылау жүйесін енгізуді жоспарлап отыр, деп хабарлайды QazMonitor.
Жобаның негізгі мақсаты – стационарлық және жартылай стационарлық мекемелерде қызмет алатын азаматтардың қауіпсіздігін арттыру. Осы мақсатта ведомство «ProtectorAI» жүйесін енгізуді көздейді. Бұл интеллектуалды бейнеталдау жүйесі әлеуметтік мекемелер аумағында агрессивті мінез-құлықты, буллингті және өзге де қауіп-қатерлерді ерте кезеңде анықтауға мүмкіндік береді.
Жобаға сәйкес, жаңа үлгідегі бейнебақылау жүйелері ұйым аумағын толық қамтиды. Атап айтқанда, негізгі және қосалқы кіреберістер, ортақ пайдаланылатын бөлмелер, кабинеттер және қойма үй-жайлары бақылауда болады.
Құжатта әлеуметтік мекемелер қызметінің ашықтығын қамтамасыз ету және қызмет алушылардың құқықтарын қорғау мәселесіне ерекше мән берілген. Ережелерге сәйкес, жақын туыстарының ресми өтініші негізінде бейнежазбаларды қарау мүмкіндігі ұсынылады.
Тиісті бұйрық жобасы «Ашық НҚА» порталында жарияланып, қоғамдық талқылауға шығарылды.